BLACKPINK's Lisa, Binigyan ng Personalized na Regalo ng Lumikha ng LaBubu!

Nagdulot ng kasiyahan sa mga fans ang pinakabagong post ni BLACKPINK's Lisa sa kanyang social media. Napakita siya na hawak ang isang espesyal na regalo mula kay Kasing Lung, ang artist sa likod ng sikat na karakter na si LaBubu.

Sa kanyang post, makikita si Lisa na masayang nakangiti habang hawak ang isang "MOCOCO" LaBubu figure, na may kakaibang pink na balahibo. Ang regalo ay may kasamang personal na mensahe at drawing mula kay Kasing Lung na nagsasabing, "To. Lisa!! Thank For Your Big Support!".

Ang natanggap na regalo ay bahagi ng "Jump Into Summer" series, isang "Vinyl Plush Pendant" na kilala sa cute nitong disenyo, pink na balahibo, at ribbon. Ang personal touch ng artist ay tiyak na nagbigay ng espesyal na halaga sa regalo para kay Lisa.

Kilala ang global superstar sa kanyang pagkahilig sa LaBubu, na madalas niyang ipinapakita sa kanyang social media noon pa man, na nagresulta pa nga sa pagkaubos ng stocks ng produkto. Kamakailan lang, nag-transform pa siya na parang "human LaBubu" sa isang konsyerto sa London, na labis na ikinatuwa ng kanyang mga tagahanga.

Si Lalisa Manobal, mas kilala bilang Lisa, ay isang Thai rapper, singer, at dancer na nakabase sa South Korea. Siya ay miyembro ng sikat na K-pop girl group na BLACKPINK. Kilala siya sa kanyang mala-diyosang ganda, husay sa pagra-rap, at nakaka-akit na stage presence. Bukod sa pagiging miyembro ng BLACKPINK, nagkaroon na rin siya ng matagumpay na solo career sa musika.