Самсунг басшысы Ли Джэ Ёнға кофе берген қызметкерге 50 мың вон сыйлық!

Азия-Тынық мұхиты экономикалық ынтымақтастық (APEC) саммиті кезінде Samsung Electronics компаниясының төрағасы Ли Джэ Ёнға кофе ұсынған қызметкер туралы әңгіме желіде қызу талқылау тудыруда. Бұл жағдайды сол қызметкер өзінің әлеуметтік желісінде бөлісті.

APEC саммиті өтіп жатқан Кёнджу қаласындағы бір коффеханада жұмыс істейтінін айтқан қызметкер, "Мен көптеген ерекше тәжірибелер алдым, бірақ ең қуаныштысы – төраға Ли Джэ Ёнмен кездесуім болды" деп жазып, бірнеше сурет жариялады.

Суреттерде Ли төрағаның қолында кофемен, қызметкермен бірге күліп тұрған сәті түсірілген. Сондай-ақ, қызметкердің қолында 50 мың корей воны (шамамен 17 мың теңге) бар банкнотты ұстап тұрған сәті де көрсетілген. "Жол бойында келе жатқан төрағаға бір стақан кофе ұсындым. Ол рақметін айтып, жүріп кетті. Бірақ кейін қайта оралып, шалбарының қалтасынан 50 мың вон ақшаны шығарып, маған берді", - деп баяндады қызметкер. "Ол әдемі, сымбатты әрі зиялы жан екен. Берген ақшаны мен суретке салып, естелік ретінде сақтаймын", - деп жазды ол.

Бұл жазба бір күн ішінде 300 мыңнан астам қаралым жинап, мыңға жуық пайдаланушы "ұнату" белгісін қойған.

Желі қолданушыларының бірі "Samsung бас директоры әмиянынан емес, қалтасынан ақша шығарды ма?" деп сұрағанда, қызметкер "Иә, қарапайым адам сияқты еді" деп жауап берген. Басқа бір пайдаланушы "Қаншалықты қобалжып, бақытты болдыңыз?" деп сұрағанда, "Қолым дірілдеп, кофе дайындау қиын болды. Маған керемет естелік сыйлады" деп айтты.