Парк Джун-хун өткендегі есірткі ісі туралы кітабында ашық айтты

Корей актері Парк Джун-хун өткендегі даулы есірткі ісі туралы жаңа кітабында ашық айтып, жұртшылықтың назарын аударды.

Сәуірдің 4-і күні Сеулдегі Чондон 1928 өнер орталығында Парк Джун-хунның «Өкінбе» (후회하지마) атты эссесінің тұсаукесері өтті. Бұл шараға актердің өзі мен пианист-жазушы Мун А-рам қатысты.

Актердің айтуынша, эсседе өзінің жақсы істері мен кемшіліктері, тіпті жеке өмірінің қырлары да баяндалған. Соның ішінде, өткенде қоғамда үлкен резонанс тудырған есірткі ісі туралы да сөз еткен.

Басылымдардың хабарлауынша, 1994 жылы тамызда Парк Джун-хун ағылшын тілі мұғалімі болып жұмыс істеген американдық әскер қызметкерімен бірге төрт рет есірткі қолданды деген айып тағылған. Кейіннен, Сеул аудандық прокуратурасы Парк Джун-хун мен басқаларды есірткі туралы заңнаманы бұзғаны үшін қамауға алған болатын.

Парк өзінің «Өкінбе» кітабында бұл даулы істі ешқандай қысқартпастан жазғанын айтты. Оның себебін түсіндіріп, «Өз туралы айтқанда тек жақсылықты ғана тізу сенімсіздік тудырады. Әрине, жағымсыз жайттардың бәрін жаюдың қажеті жоқ, бірақ бұл іс 80-90 жылдары туғандар үшін есінде болмаса да, мен үшін өте маңызды оқиға болды. Бұл туралы жазу кітаптың сенімділігін арттырады деп ойладым», — деді ол.

«Ақыр аяғында, өткен шақ менікі. Жақсы істер де, жаман істер де менің қолымнан келген. Осы жаста оларды қалай түзетіп, дамыту керектігін түсіндім», — деді актер. Ол өзінің ұнататын сөзімен мысал келтірді: «Бұл сәл күлкілі естілуі мүмкін, бірақ менің сүйікті сөзім – 100% цементтен жасалған бетон сынғыш болады. Оған қиыршық тас пен құм қосылса ғана мықты бетон болады».

«Ешкім де мінсіз емес. Қателеспеген адам бар ма? Мен мұндай қателіктерді қалай еңсердім, қалай ойлайтыным маңызды деп ойлаймын. Мен үшін бұл қателіктер қиыршық тас пен құмның рөлін атқарады. Мен оларды қайталағым келмейді, бірақ өткен қателіктерімді де өзімдікі деп қабылдаймын», — деп атап өтті Парк Джун-хун.

Актердің «Өкінбе» кітабы наурыздың 29-ы күні жарық көрді. Кітапта Парк Джун-хуннің 40 жылдық актерлік мансабы мен адам ретіндегі өмірі туралы баяндалады.

Корей желі қолданушылары Парк Джун-хуннің ашықтығына әртүрлі пікір білдіруде. Кейбіреулер оның шыншылдығын және өткенін мойындағанын мақтап, «қателерін мойындауы батылдық» деп жазды. Ал басқалары «Неге енді бұл туралы айту керек?» деп, бұл оның беделін жақсарту әрекеті ме деп күдіктенуде.