K-поп жұлдызы ХёнА сахнада естен танып құлады: Денсаулығына қатысты алаңдаушылық қайта күшейді
Белгілі K-поп әншісі ХёнА (HyunA) «Waterbomb 2025 Macau» фестивалінде өнер көрсетіп жүргенде сахнада кенет естен танып құлап қалды. Бұл жағдай оның бұрынғы «Вазовагалдық синкопы» (Vasovagal Syncope) атты денсаулық мәселелерін қайта назарға іліктірді.
6 маусымда Макаода өткен фестивальда ХёнА өзінің танымал әндерін орындап жатқан. Алайда, өнер көрсету кезінде оның басы айналып, есін жинамай сахнада тіпті құлап қалды. Сахнадағы бишілер дереу оның жанына ұмтылып, жағдайын тексеріп, қорғауға кірісті. Қауіпсіздік қызметкерлері оны сахнадан көтеріп әкеткен кезде, көрермендер үлкен шок пен уайымға түсті.
Осы оқиғадан кейін ХёнА өзінің әлеуметтік желісі арқылы «Өте, өте кешірім сұраймын. Жақсы өнер көрсеткім келген еді, бірақ кәсіби түрде өнер көрсете алмадым. Шынымды айтсам, мен ештеңе есімде жоқ, бірақ бұл туралы міндетті түрде айтқым келді» деп жазды. «Енді денсаулығымды жақсартып, үнемі тырысатын боламын» деп уәде берді.
ХёнА 2020 жылы «вазовагалдық синкоп» диагнозымен уақытша жұмысын тоқтатқан болатын. Бұл ауру стресс, шаршау, тым қатты салмақ жоғалту, сусыздану сияқты жағдайларда қан қысымы мен жүрек соғысының күрт төмендеп, миға қан ағымы азайып, адамның есінен тануына әкеледі. Әсіресе, тым қатты шиеленіс, шамадан тыс жүктеме немесе салмақтағы күрт өзгерістер бұл жағдайды тудыратын негізгі факторлар болып табылады.
Өткен жылы ХёнА сахнада жақсы өнер көрсету үшін әдемі болуға тырысып, қатты диета ұстағандықтан, айына 12 рет естен танып қалғанын мойындаған еді. Жуырда ғана бір айда шамамен 10 келі салмақтан арылғанын айтты. ХёнА өзінің жеке аккаунтында 49 келіні көрсеткен таразының суретін жариялап, «50-ден бастап алдыңғы санды өзгерту өте қиын. Әлі алыс екен. Осы уақытта мен қанша жеп ем? Ким ХёнА, ХёнА!!!!» деп жазды.
10 келіден астам салмақтан арылған ХёнА осымен тоқтап қалмай, диета ұстауға деген жігерін жанып, Макаодағы Waterbomb фестиваліне дайындалды.
Корейлік интернет қолданушылар ХёнАның денсаулығына алаңдаушылық білдіріп жатыр. «Денсаулық бәрінен бұрын», «Денсаулығын жоғалтса, бәрін жоғалтады», «Біз үшін сахнадан гөрі ХёнАның қауіпсіздігі маңызды» деген сияқты пікірлер көптеп тарауда. Олар әншінің амандығы басты назарда екенін атап өтуде.