Әнші Ким Хо-жуң түрмеде бопсалауға ұшырады: Түрме қызметкері миллиондаған ақша талап еткен

Мас күйінде көлік жүргізіп, жол-көлік оқиғасын жасап, сол жерден қашып кеткені үшін сотталып, жазасын өтеп жатқан әнші Ким Хо-жуңға түрме қызметкері бопсалау жасағаны анықталды.

Кореяның Әділет министрлігі мен жазаны өтеу жүйесінің хабарлауынша, Йеджу қаласындағы жекеменшік Соманг түрмесінің қызметкері «А» әншіге «Мен сені Соманг түрмесіне орналасуыңа көмектестім, сондықтан 30 миллион вон (шамамен 20 мың еуро) төле» деп талап еткен.

Әнші бұл ақшаны бермегенімен, «Менің сөзімді тыңдамасаң, түрмеде өмірің қиын болады» деген қорқыныштан ішкі қызметкерлерге жағдайды айтып берген. Содан кейін тергеу басталды.

Қазіргі таңда Әділет министрлігі аталған қызметкерге қатысты тексеру жүргізіп жатыр. Ким Хо-жуңның өкілі бұл жағдайды «тек бір сәтте болған оқиға» деп мәлімдеді.

Бұған дейін Ким Хо-жуң мас күйінде көлік тізгіндеп, жол апатын жасап, оқиға орнынан ізін суытқаны үшін қамауға алынған болатын. Ол бірінші және екінші сатыдағы соттарда 2 жыл 6 ай бас бостандығынан айырылып, қазір жазасын өтеп жатыр. Биыл тамыз айында ол Сеул түрмесінен Йеджу қаласындағы Соманг жекеменшік түрмесіне ауыстырылған.

Кореялық желі қолданушылары бұл жаңалыққа ашулы. "Сот үкімімен жазасын өтеп отырған адамға осындай жағдай жасалуы қалай?" "Бұл қызметкерге заң бойынша шара қолданылсын", - деп пікір білдіруде. Кейбіреулер әншінің өзі де заң бұзғанын ескертіп, енді оған жасалған әрекеттің орынды-орынды еместігін талқылап жатыр.