Хён Бин «Алтын айдаһар» сыйлығын алды, әйелі Сон Йе-джинді еске алды
19 желтоқсанда Сеулдегі KBS холлында өткен 46-шы «Алтын айдаһар» киномарапанында актер Хён Бин үздік ер адам рөлі үшін сыйлықты иеленді. Іс-шараны корей актрисалары Хан Джи-мин мен Ли Дже-хун жүргізді.
«Харбин» фильміндегі рөлі үшін марапатталған Хён Бин өз сөзінде: «Мен «Харбин» фильмін түсіру кезінде фильмнен де көп нәрсені сезіндім. Менің елімізде өмір сүріп, осы сахнада тұруым – біздің елімізді қорғау үшін күрескен және құрбан болған көптеген адамдардың арқасы. Бұл сыйлықты мен сол жандарға арнаймын», – деп терең иіліп, ризашылығын білдірді.
Сонымен қатар, Хён Бин «Харбин» фильміндегі Ан Чжун-гын рөліне алғашқыда өзінің сенімсіздігін білдіргенін айтты. «Мен сол кезде өмір сүрген адамдардың ауыр қайғысын, үмітсіздігін және елді қорғауға деген жауапкершілікті сезінуге батылым жетпеді. Сондықтан мен бұл рөлден бас тарттым. Бірақ, режиссер У Мин-хо мені қолдап, бұл маңызды жұмыс екеніне сендіріп, мені соңына дейін жетеледі. Ол болмаса, мен бүгін мұнда тұра алмас едім», – деді ол. Ол сондай-ақ, фильмнің түсіріліміне атсалысқан Чон Мин, Ё Бин және басқа да барлық команда мүшелеріне алғыс айтты.
Ерекше атап өткені – Хён Бин әйелі Сон Йе-джинге арнаған сөздері. «Менің артымда үнсіз қолдау көрсетіп жүрген отбасыма, компаниядағы әріптестеріме, жанкүйерлеріме және «Харбин» фильмін ұнатқан көрермендерге үлкен рахмет. Менің өмірімдегі үлкен тірегім – жанымдағы жарым Йе-джин, және біздің ұлымыз, сіздерді өте жақсы көремін және рахметімді айтамын», – деді актер.
Осы сәтте камера Сон Йе-джинді көрсетті, ол қолымен жүрек пішінін жасап, жылы лебізін білдірді. Хён Бин сөздерін: «Соңында, бұл фильм арқылы біз қорғауға тиіс құндылықтар мен ұмытпауға тиіс тарихты сіздермен бөлісу бақыт болды. Рахмет!» деп аяқтады.
Корей желі қолданушылары Хён Биннің сөзін жоғары бағалады. Оның шыншылдығы мен алғыс айту мәдениеті, әсіресе әйелі Сон Йе-джинге деген сүйіспеншілігі көпшілікті тәнті етті. Көптеген жанкүйерлер оны марапатымен құттықтап, өздерінің мақтаныштарын білдірді.