«Бұл мүмкін емес» фильмі 46-шы Blue Dragon киномарапазында алтынды қоржынға салды

Сейсенбіде Сеулдің Ёыйдо қаласындағы KBS залында өткен 46-шы Blue Dragon киномарапазында «Бұл мүмкін емес» (түпнұсқа атауы: 어쩔수가없다) фильмі айқын жеңімпаз атанды. Үздік фильм аталымы бойынша бас жүлдеге ие болған туынды, барлығы алты статуэтканы қанжығалады.

Былтырғыдай, Хан Джи-мин мен Ли Дже-хун жүргізген марапаттау кешінде, өткен жылдың 11 қазанынан бастап осы жылдың 7 қазанына дейін шыққан 154 корей фильмі қаралды.

Халықаралық деңгейде жоғары бағаланған Пак Чхан-ук режиссерлік еткен «Бұл мүмкін емес» фильмі кештің басты назарында болды. Техникалық (Чо Сан-гён), музыка (Чо Ён-ук) салаларындағы марапаттармен қатар, Ли Сон-мин үздік екінші пландағы ер адам рөлі үшін, Сон Йе-джин үздік әйел рөлі үшін, Пак Чхан-ук үздік режиссер атағын, ал фильмнің өзі үздік фильм номинациясын иеленді.

«Бұл мүмкін емес» фильмінің продюсерлік компаниясы Moho Film басшысы Пэк Чи-сон сахнада былай деді: «Бұл фильмді түсіру Пак Чхан-ук режиссер үшін 20 жылға созылды. Мун Со-ри айтқандай, қазіргі киноиндустрия қысқарып жатқаны сезіледі. 20 жылдан кейін аяқталған «Бұл мүмкін емес» фильмін көріп, көптеген киногерлер үміт пен жігер алады деп сенемін».

Сон Йе-джин жеті жылдан кейін экранға қайта оралып, үздік әйел рөлі үшін марапатқа ие болды. Ол: «Тұрмыс құрып, ана атанғаннан кейін, мен әлемге деген көзқарасым мен эмоцияларымның өзгергенін сезінемін. Мен шынымен жақсы адам болғым келеді және сіздердің жандарыңызда үнемі дамып отыратын керемет актриса болғым келеді» деп бөлісті.

Әсіресе, Сон Йе-джин мен оның жұбайы Хён Бин екеуі де марапат иегері атанды. Хён Бин «Харбин» (Harbin) фильміндегі рөлі үшін үздік ер адам рөлі номинациясын жеңіп алды. Осылайша, олар бұл марапаттауда бірге жеңіске жеткен алғашқы жұп ретінде тарихта қалды. Олар сондай-ақ Chung Jung Won танымал жұлдыз жүлдесін жеңіп, әрқайсысы екі марапатқа ие болды.

Сон Йе-джин: «Мен өте жақсы көретін екі еркек, Ким Тэ-пён (Хён Биннің шынайы аты) және біздің ұлымызбен осы марапаттың қуанышын бөлісемін» деді.

«Харбин» фильмінде корей тәуелсіз армиясының штаб бастығы Ан Джун-гын рөлін сомдаған Хён Бин: «Біздің елімізді қорғау жолында құрбан болған сансыз адамдардың арқасында біз бүгін осында тұрып жатырмыз деп ойлаймын» деген мағыналы сөздерін айтты. Ол сондай-ақ: «Өзінің болуымен маған үлкен күш беретін әйелім Сон Йе-джин, және ұлымыз, сіздерді жақсы көремін, рахмет» деп өзінің сүйіспеншілігін білдірді.

Үздік режиссер атағын алған Пак Чхан-ук шетелде болғандықтан марапаттау кешіне қатыса алмады. Үздік екінші пландағы ер адам рөлі үшін марапат алған Ли Сон-мин оның атынан жүлдені алды. Ол: ««Бұл мүмкін емес» фильмі – мен 20 жыл бұрын алғаш рет романды оқығаннан бері армандаған нәрсемнің жүзеге асқандығы. Бұл менің елестеткенімнен де артық жұмыс істеген актерлеріміз бен командамыздың арқасында мүмкін болды» деп, әріптестеріне алғыс айтты.

Үздік екінші пландағы ер адам рөлі үшін марапат иегері атанған Ли Сон-мин: «Мен лайықсыз рөл үшін осы марапатты алғаныма өте ризамын» деді. Сахнадан түсіп бара жатып, ол қайта оралып: «Мен Пак Хи-сун номинацияланады деп ойлаған едім. Хи-сун, сенің таңдалмағаныңа өкінемін. Хи-сун, рахмет, мен сені жақсы көремін!» деп, әріптесі Пак Хи-сунға сүйіспеншілігін білдірді.

Өмірде бір-ақ рет берілетін үздік жаңадан келген актер марапатын «Амеба қыздары және мектеп елесі: Мектеп ашу күні» фильмі үшін Ким До-ён және «Шайтан келді» фильмі үшін Ан Бо-хён иеленді.

Ким До-ён: «Мен топ солисті ретінде дебют жасағанда, көптеген жанкүйерлер менің сахнада билеп, ән айтқанымды жақсы көрді. Менің әртістік қызыметімді үнемі қолдайтындарына рахметімді білдіремін» деді.

Әкесінің туған күнінде марапат алған Ан Бо-хён: «Бұл маған берілген бағалы сыйлық сияқты. Мен көптен бері хабарласқан жоқпын, бірақ міндетті түрде хабарласамын. Сондай-ақ, денсаулығы нашарлаған әжеме. Әже, мен сыйлық алдым. Егер мен Пусанға барсам, бұл сыйлықты міндетті түрде саған беремін!» деп қуана айқайлады.

Алайда, 200 миллион вон бюджетпен 10 миллиард вон табыс тапқан Ён Сан-хоның «Бет» (түпнұсқа атауы: 얼굴) фильмі техникалық, монтаж, көркемдік безендіру, үздік ер мен әйел екінші пландағы рөлдер, үздік ер адам рөлі, үздік режиссер және үздік фильм сияқты 10 номинацияға ие болғанымен, ешқандай жүлдесіз қалды. Сондай-ақ, Ли Хе-ённың экшн рөлімен танылған және Берлин мен Брюссель кинофестивальдеріне қатысқан «Парфюм» (түпнұсқа атауы: 파과) фильмі де күткен нәтижесін бермеді.

Корей желі қолданушылары Хён Бин мен Сон Йе-джиннің бірге жеңіске жетуін «киноиндустрияның ең әдемі жұбы» деп атап, үлкен қуанышпен қарсы алды. Көпшілік Хён Биннің елі үшін күрескендерге деген терең алғысын да жоғары бағалады.