10 жылдан кейін некеге отыратын болды: Оңтүстік Корея жұлдыздары Шин Мин-а мен Ким У-бин үйленеді!

Оңтүстік Кореяның танымал актерлері Шин Мин-а мен Ким У-бин 10 жылға созылған махаббаттарын некемен қорытындылайтыны туралы қуанышты жаңалық тарады. Бұл жаңалық бүкіл әлемдегі жанкүйерлерді шаттыққа бөледі.

2015 жылдан бері жұртшылыққа жария болып келген бұл жұлдызды жұп, ұзақ уақыт бойы қалыптасқан терең сенімге негізделіп, бір-біріне өмірлік серік болуға уәде берді. Бұл туралы олардың агенттігі AM Entertainment хабарлады. "Біз ұзақ қарым-қатынас барысында орнықтырған терең сенімге сүйене отырып, Шин Мин-а мен Ким У-бин бір-біріне өмірлік серік болуға ант берді", - делінген агенттіктің хабарламасында.

Салтанатты шара 20 желтоқсанда Сеулде өтеді деп жоспарлануда. Тойдың жабық түрде, тек жақын туыстары мен достарының қатысуымен өтетіні айтылды. "Екі жақ отбасылары мен жақын достарының қатысуымен жеке рәсім ұйымдастырылады", - деп мәлімдеді олардың агенттігі.

Үйлену тойларына қарамастан, Шин Мин-а мен Ким У-бин өздерінің актерлік мансаптарына адал болып қалады. "Өмірдегі маңызды шешім қабылдаған бұл екі жасқа жылы лебіздеріңіз бен тілектеріңізді білдірулеріңізді сұраймыз. Сонымен қатар, екеуі де актер ретінде өз кәсібіне адал болып, сіздердің қолдауларыңызға лайықты болуға тырысады", - деп агенттік хабарлады.

Бұл қуанышты жаңалық, корей ойын-сауық индустриясындағы ең сүйікті жұптардың бірі үшін жаңа кезеңнің бастамасы болды.

Кореялық интернет қолданушылар бұл жаңалыққа үлкен қуанышпен қарап, жаппай құттықтаулар жолдауда. "Ақыры! Олар өте әдемі жұп, мен әрқашан осы жаңалықты күттім", - деп жазды бір жанкүйер. "Ең әдемі жұпқа құтты болсын, олардың махаббат тарихы шабыттандырады!" - деген пікірлер көптеп кездеседі.