Әнші Лим Ёң-вуңның жанкүйерлері балалар үйіне кимчи сыйлады
Әнші Лим Ёң-вуңның (Lim Young-woong) «Hero Generation» (Герой ұрпағы) атты жанкүйерлер клубының Кваңжу-Жоннам (Gwangju-Jeonnam) бөлімшесі, Жоннам провинциясындағы Нажу қаласында орналасқан Ехуа балалар үйіне (Ewha Orphanage) кимжаң-кимчи (Kimjang-kimchi) жаптыруға қаржылай көмек көрсетіп, жыл соңындағы қайырымдылық акциясын жалғастырды.
Ехуа балалар үйі 12 желтоқсанда «Hero Generation» Кваңжу-Жоннам бөлімшесінің 2 миллион вон сомасындағы кимчи сыйлағанын хабарлады. Бұл қайырымдылық шарасы, суық қыс алдында балалар үйінде тұратын сәбилерге салауатты әрі жылы ас ұсыну мақсатында ұйымдастырылды.
Жанкүйерлер клубы мүшелерінің ерекше ынта-ықыласымен дайындалған кимжаң-кимчиге қырыққабат кимчиі, қыша жапырақ кимчиі, ақ кимчи және доңчими (Dongchimi) сияқты түрлері кірді. Иммунитеті әлсіз сәбилердің де дәмді әрі қауіпсіз жеуі үшін барлық жағдай жасалған.
Сыйлық тапсыру рәсіміне Ехуа балалар үйінің директоры Ки Се-сун (Ki Se-soon) және «Hero Generation» Кваңжу-Жоннам бөлімшесінің мүшелері қатысты. Бұл жанкүйерлер клубы 2023 жылдан бері балалар үйімен тығыз байланыста болып, тұрақты түрде көмек көрсетіп келеді. Олар «Отбасы айы» мерекесіне орай заттай сыйлықтар табыстап, бала тәрбиесіне ерікті түрде атсалысып, өткен жылғыдай биыл да кимчи сыйлап, еріктілер көмегімен балалардың қысқысын жақсы қарсы алуына қолдау көрсетуде.
Жанкүйерлер клубының өкілі: «Қыс келгенде алдымен балалар еске түседі. Балалардың кимчиді жақсы көріп, ұнатып жейтінін естігенде, биыл да жүрегіміз оларға қарай ұмтылды», - деп өз ойын білдірді. «Бір-бірімізге жылылық сыйлай алған уақыт үшін ризамыз», - деді ол.
Директор Ки Се-сун: «Әр жыл сайын балалар үшін өздерінің ынта-ықыластарын аямайтын «Hero Generation» Кваңжу-Жоннам мүшелеріне шын жүректен алғыс айтамын. Жақсылыққа ұмтылған жанкүйерлердің ықпалы мен жылы махаббаты балаларға үлкен күш береді. Біз балалардың салауатты өсуі үшін бірлесіп күш сала беретін боламыз», - деді.
Бұл қайырымдылық шарасы, Лим Ёң-вуңның Кваңжуда өтетін концерттері қарсаңында өтуімен ерекше маңызға ие болды. «Hero Generation» Кваңжу-Жоннам бөлімшесі 19-21 желтоқсан аралығында Кимдэджонг конвенция орталығында (Kimdaejung Convention Center) өтетін «2025 Ұлттық тур концерті IM HERO 2 Gwangju»-дың табысты өтуіне тілектестік білдіріп, музыка мен қайырымдылық арқылы жылы жыл соңын қорытындылауды көздеуде.
Жанкүйерлер клубының мүшелері: «Лим Ёң-вуңның әндері арқылы жеткізетін демеуі мен махаббаты бізге қандай күш берсе, біз де қоғамның әртүрлі салаларына шағын демеу мен жылылықты жеткізгіміз келеді. Жақсы ниетпен кимчи жаптыруға атсалысып, Ёң-вуңның рухын жүзеге асырғанымызға ерекше мән береміз», - деп өздерінің ойларын жеткізді.
Корейлік интернет қолданушылар жанкүйерлер клубының бұл қайырымдылық шарасын жоғары бағалады. «Лим Ёң-вуңға деген махаббаттың осындай ізгі істерге ұласып жатқанын көру тамаша», - деп жазды бір желі қолданушысы. Басқалары жанкүйерлер клубының тұрақты әрекеттерін мақтап: «Бұл – шынайы жанкүйерліктің мәні» деп атап өтті.