Дуучин Ким Хун-гук улс төрд хамаагүй болж, уран бүтээлдээ эргэн орлоо

Дуучин Ким Хун-гук улс төрийн асуудлаас хол байж, өөрийн үндсэн ажил болох уран бүтээлдээ эргэн орно гэдгээ мэдэгдлээ.

10-р сарын 20-нд Ким Хун-гук Daebak Planning-ээр дамжуулан "Одоо би зөвхөн дуу, хөгжмөөр ард түмний төлөө зогсоно" хэмээн улс төрийн маргаанаас ангид уран бүтээлчээр эргэн ирэх төлөвлөгөөгөө зарлалаа.

Урьд нь Ким Хун-гук нь Ерөнхийлөгч асан Юн Сок-ёлийг эсэргүүцэх жагсаалд оролцож, өөрийн консерватив үзэл бодлоо илэрхийлж байсан. Өнгөрсөн нэгдүгээр сард тэрээр Сөүл хотын Ёнсан-гуд байрлах Ерөнхийлөгч асан Юн Сок-ёлийн байрны өмнө болсон баривчлалтыг эсэргүүцэх жагсаалд оролцож, мөн Сөүл хотын Баруун шүүхийн эмх замбараагүй байдлыг дэмжсэн нь хэл ам дагуулж байв.

Гэхдээ одоо тэрээр энэ бүх улс төрийн байр сууриас холдоно гэдгээ илэрхийлсэн. "Би улс төрийн яриагаа орхиж, тайзан дээр ард түмэнтэйгээ хамт инээж, дуулах болно. Улс төр миний зам биш байсан. Би хүмүүст инээдийг бэлэглэж, хамт дуулахдаа хамгийн аз жаргалтай байдаг. Энэ бол жинхэнэ Ким Хун-гук" хэмээн тэрээр хэллээ.

Одоогоор Ким Хун-гук шинэ дуутайгаа хамт өөрийн YouTube сувгаа бэлтгэж байна. Шинэ дууны тухайд түүний хит "Хоранг-наби" дууны эрч хүчтэй энерги шингэсэн бүтээл болно гэж таамаглаж байна.

Үүнтэй холбогдуулан Ким Хун-гукийн тал "Улс төрийн хандлагаас болж дуучин Ким Хун-гукийн жинхэнэ дүр төрх далдлагдсан ч, энэ шийдвэрээрээ тэрээр дахин дуу, хөгжмийн төвд эргэн ирэхийг зорьж байна" гэдгийг онцлон тэмдэглэв. Мөн Ким Хун-гук "Шинэ дууны уран бүтээлээ хийхээс гадна, би дахин ард түмний "Хоранг-наби" болмоор байна. Ард түмэндээ инээд болон итгэл найдврыг дахин бэлэглэж чадвал энэ миний амьдралын хоёр дахь үеийн эхлэл болно" хэмээн нэмж хэллээ.

Солонгосын интернет хэрэглэгчид энэ мэдээг талархуулж, дуучин эргэн өөрийн үндсэн ажил руугаа орж буйд баяртай байгаагаа илэрхийлжээ. Олон хүн "Эцэст нь тэр өөрийн хамгийн сайн хийдэг зүйлээ хийхээр боллоо!", "Шинэ дуу, хөгжмийг тэсэн ядан хүлээж байна!" гэж сэтгэгдэл үлдээсэн байна.