Батхилаа! Им Юна Вьетнамд фенүүдээ гайхашрууллаа
“Эзэн хааны тогооч” киноны нэрийг дэлхий даяар алдаршуулсан Им Юна (SM Entertainment) Вьетнамд зохион байгуулсан фэн уулзалтаараа фэнүүдээ баярлуулав.
Өнгөрсөн арваннэгдүгээр сарын 18-нд Вьетнамын Хо Ши Мин хотын NGUYEN DU GYMNASIUM-д зохион байгуулагдсан “Bon Appétit, Your Majesty YOONA DRAMA FANMEETING” арга хэмжээнд тэрбээр фэнүүдтэйгээ мартагдашгүй дурсамжийг бүтээсэн юм.
Саяхан дууссан tvN телевизийн “Эзэн хааны тогооч” киногоороо Францын тогооч Ён Жи Ёнгийн дүрд амжилттай тоглосон Им Юна, тус киноныхоо сонирхолтой түүх, онцгой мөчүүдийг фэнүүдтэйгээ хуваалцах зорилгоор энэхүү уулзалтыг зохион байгуулжээ. Түүнийг тайзнаа гарч ирэхэд фэнүүд алга ташин угтаж, түүний “дэлхийн хатан” гэсэн нэр хүндийг харуулсан.
Тэрбээр киноны бэлтгэл, зураг авалтын явцад болсон хөгжилтэй явдлууд, дүрээ бүтээсэн тухай фэнүүдийн асуултад хариулж, зөвхөн энэхүү фэн уулзалтад зориулсан нууц түүхүүдийг дэлгэсэн нь олны анхаарлыг татсан.
Ялангуяа, “Эзэн хааны тогооч” киногоос сэдэвлэсэн “Цаг хугацааг туулан чам руу” дууны аяыг дэлгэцэн дээрээс эмзэг, зөөлөн хоолойгоороо дуулж, тайзнаа Вьетнамын үндэсний жимсний зайрмагийг өөрийн гараар хийж, азтэн фэнүүддээ бэлэглэн, арга хэмжээг улам сонирхолтой болгосон.
Хариуд нь фэнүүд ч тогоочийн хувцас, дарга, хааны хувцас, үндэсний хувцас, бүр кинон дээрх Ён Жи Ёнгийн онцгой хувцастай ч ирсэн нь уур амьсгалыг улам бүр халуун болгож, “Ён Жи Ён, хэрвээ энэ захиаг уншиж байвал үргэлж аз жаргалтай байхыг бүү мартаарай” гэсэн уриа бүхий банер барин, сэтгэл хөдлөм бэлгийг бэлдсэн байв.
Им Юна “Вьетнамд ирээд удаагүй ч, алсаас намайг дэмжиж, хайрласанд баярлалаа. Та бүхэнтэйгээ уулзах боломж олдож байгаадаа үнэхээр талархаж байна. Цаашид ч хийх ажил, бүтээлүүдээ харуулах болно. Одоогийнхоо л хэвээр дэмжвэл би та бүхэнтэй золгохоор гүйж ирнэ” хэмээн сэтгэлээсээ хуваалцсан бөгөөд, соло дуу “Дусүнгү гудамжны хаврын өдөр” (Feat. 10cm) дуугаа дуулж, фэнүүдтэйгээ дараагийн уулзалтын амлалт өгчээ.
“Эзэн хааны тогооч” кино Им Юнагийн бүтээлээр Сөүл хотод 17.4% (хамгийн өндөр нь 20%), улсын хэмжээнд 17.1% (хамгийн өндөр нь 19.4%) үзэгчдийн үнэлгээг авсан төдийгүй, Netflix-ийн “Дэлхийн ТОП10 ТВ (Англи хэлгүй)” ангилалд 2 долоо хоног дараалан тэргүүлж, дотоод болон гадаадад өргөнөөр хүлээн авагдсан билээ.
Энэхүү алдар хүндийг батлах мэт, Им Юна “Эзэн хааны тогооч” фэн уулзалтаа Токио, Макао, Хо Ши Мин хотуудад амжилттай хийж дууссаны дараа, 11-р сарын 23-нд Тайпей, 12-р сарын 13-нд Бангкок хотод хийхээр төлөвлөж, киноны үлдэц үйлчлэлийг оны эцэс хүртэл үргэлжлүүлэхээр болжээ.
Монголын интернэт хэрэглэгчид түүний фэн уулзалтын талаар “Юна маань үнэхээр авьяастай, үзэсгэлэнтэй юм аа”, “Жинхэнэ хатан гэж энэ л дээ”, “Дараагийн уран бүтээлийг нь тэсэн ядан хүлээж байна” гэх зэргээр сэтгэгдэл үлдээжээ.