Дуучин Хваса шинэ дүр төрх, чин сэтгэлийн ярилцлагаараа гайхшрууллаа
Алдарт дуучин Хваса богино үсэнд орж, бүхэлдээ өөрчлөгдсөн дүр төрхөөрөө шүтэн бишрэгчдээ гайхшруулж байна.
"Harper's Bazaar Korea" сэтгүүл арваннэгдүгээр сарын дугаартаа зориулсан Хвасагийн шинэ зургийн цомогийг дэлгэлээ.
Өнгөрсөн арвантавны өдөр шинэ дижитал сингл 'Good Goodbye'-аа гаргасан Хваса энэ удаагийн зураг авалтанд өмнөх тайзны хүчирхэг дүр төрхөөсөө тэс өөр, богино үстэй, хамгийн тайван, байгалийн жамтай харагдаж байна.
Зураг авалтын дараа хийсэн ярилцлагадаа Хваса шинэ дуугандаа яагаад баллад төрлийг сонгосон тухайгаа тайлбарлалаа: "Энэ бол 'Хваса' гэхээсээ илүүтэй 'Ан Хе-жин' гэдэг хүний дуулсан дуу юм. Тайзны гялалзсан Хваса биш, харин нэгэн хувь хүн гэдэг утгаараа, захидал бичих шиг сэтгэлээ шингээсэн" гэжээ.
Түүнчлэн энэ дууг бүтээх явцад хамгийн их шаналж байсан зүйлсийнхээ талаар: "Би 'Яагаад зөвхөн ингэж л бичиж чадахав?' гэж бодоод үгийг нь хэдэн зуун удаа засварласан. Гэтэл гэнэт л бодож байгаагүй мөчүүдэд үгс нь урсч гарч ирдэг байлаа. Их чэнэгүй, дотроосоо байгалийн жамаар урсч гарч ирсэн үгс нь илүү чин сэтгэлтэй санагдсан" хэмээн ярьсан байна.
Мөн Хваса дууныхаа "Салах ёс биднийг шархтуулна, гэхдээ тансаг байх болно. Чи намайг газар цохиж харамсахын тулд чангаар инээж өгөөрэй. Баяртай" гэсэн мөрүүдийг хамгийн чин сэтгэлээсээ бичсэн хэсэг хэмээн онцолжээ.
Саяхан Хваса нь богино үстэй болж, жин хасаж 40кг жинтэй болсон нь олон нийтийн анхаарлыг татаад байсан юм. Үүний талаар Хваса нь Мунбёлийн YouTube сувагт оролцохдоо "Дуу маань ихэд эмзэг, өрөвдмөөр, сэтгэлдээ өвчин шаналгаатай хүний тухай юм. Тиймээс би бие махбодио ч гэсэн санаа зовоод турах юм шиг хийхийг хүссэн. Багштайгаа ярилцаад, сургалтын аргыг өөрчилж, сул дорой, эмзэг биетэй болох төлөвлөгөө гаргасан. Их турсны эцэст л боломжтой болсон" гэж тайлбарласан байна.
Солонгосын интернэт хэрэглэгчид Хвасагийн шинэ дүр төрхийг ихэд сайшааж байна. Олон хүн түүний богино үс маш зохицсон, ярилцлага нь чин сэтгэлтэй байсныг онцолж байна. Фенүүд нь түүний уран бүтээлийн сонголтыг дэмжиж, 'Good Goodbye' шинэ сингл амжилттай болоосой хэмээн хүсэн ерөөж байна.