Яно Шихо шинэхэн гэрлэсэн үеийн дурсамжаа хуваалцлаа

Солонгосын алдарт тамирчин Чу Сон-хуны эхнэр, Японы топ модель Яно Шихо гэр бүл болсон эхний үеийн дурсамжаа хуваалцаж, олны анхаарлыг татлаа.

Тэрээр өнгөрсөн сарын 1-нд өөрийн YouTube сувгийнхаа шинэ контентийг танилцуулахдаа "Солонгос, япон, англи хэлээр орчуулга хийгдсэн контент тавигдлаа" хэмээх пост оруулжээ.

Үүний хажуугаар "16 жилийн дараа энэ бичлэгийг үзэж байна, тэр үеэ их санаж байна..." хэмээн нэмж бичээд, хуримынхаа гэрэл зургийг хамт нийтэлсэн байна. Зураг дээр тэрээр цав цагаан даашинзтай, гайхалтай харагдаж байв.

Саяхан Яно Шихо нөхөр Чу Сон-хуны араас өөрийн YouTube сувгийг нээсэн юм. Өнгөрсөн сарын 31-нд "Яно Шихо, Чу Сон-хуны хуримыг анх удаа нээлттэй харуулж байна. 17 жилийн өмнөх түүх" хэмээх гарчигтай контент нийтэлж, ихээхэн шуугиан тарьсан. Уг контент нь тавигдсан даруйдаа 1 сая үзэлтийг давж, маш өндөр сонирхлыг хүлээж байна.

Яно Шихо, Чу Сон-хун нар 2009 онд гэрлэж, Сара хэмээх охинтой болсон. Тэд KBS 2TV телевизийн "Эргэж ирсэн супер баатрууд" нэвтрүүлгээр охин Сара-гийн өсөлт, хөгжлийг харуулж, ихэд алдаршсан билээ.

Солонгосын интернэт хэрэглэгчид "Тэдний хуримын зураг үнэхээр гоё байна!", "16 жилийн дараа ч сайхан хос хэвээрээ", "Шинэ контентийг хүлээж байна" хэмээн сэтгэгдэл үлдээжээ.