Ихэнх тэрбумтнуудад хандан Билли Айлиш: "Мөнгөө хуваалц!"

Америкийн алдарт дуучин Билли Айлиш тэрбумтнуудад зоригтойгоор хандан үг хэлжээ.

WSJ сэтгүүлийн "Инноваторын шагнал гардуулах ёслол" дээр тэрбээр хөгжмийн салбарын шинийг санаачлагчийн шагналыг хүртэн, "Одоо бид дэлхий нийтээрээ маш хүнд, харанхуй цаг үед амьдарч байна. Хүмүүст урьд хожид байгаагүй хэмжээнд ойлголцол, туслалцаа хэрэгтэй байна. Хэрэв танд мөнгө байгаа бол сайн үйлсэд зарцуулах нь зүйтэй. Магадгүй хэрэгцээтэй хүмүүстээ өгөх ч юм уу" хэмээн хэлсэн байна.

Тэрээр хэлсэн үгэндээ "Би бүгдийг хайрладаг, гэвч энд надаас илүү их мөнгөтэй хэд хэдэн хүн байна. Хэрэв та тэрбумтан бол яагаад тэрбумтан болсон бэ? Үүнийг үзэн ядалтаар хэлж байгаа биш шүү. Тийм ээ, мөнгөө хуваалц" гэж шууд хэлжээ.

Түүний энэ үгийг сонссон хүмүүс инээж, алга ташицгаасан байна. Ёслол дээр тэрбумтан Марк Цукерберг, түүний эхнэр Присцилла Чан, мөн Хейли Бибер, Спайк Ли, Жорж Лукас, Тори Бёрч зэрэг олон алдартай хүмүүс оролцсон байв.

Билли Айлишийг өмнө нь хүнсний хангамжийн тэгш байдал, уур амьсгалын шударга ёс, нүүрстөрөгчийн бохирдлыг бууруулах, уур амьсгалын хямралд хариу арга хэмжээ авах чиглэлээр үйл ажиллагаа явуулдаг байгууллага, төслүүдэд 11.5 сая ам. доллар (ойролцоогоор 16.5 тэрбум солонгос вон) хандивлэсэн түүхтэй.

Солонгосын интернэт хэрэглэгчид Билли Айлишийг магтаж, түүний зоригтой байдлыг сайшаажээ. "Олон хүн бодож байгаа ч хэлэхээс айдаг зүйлсийг тэр хэллээ" гэж нэгэн сэтгэгдэл бичжээ. "Үнэнч шударга байдлыг нь хүндэтгэе! Баячуудад илүү их зүйл хийхэд нь урам өгнө гэж найдаж байна" гэж бусад нь нэмж хэлсэн байна.