Дуучин Сон Ши-гёний 10 жилийн итгэлт менежер нь мөнгө завшсан хэргээр ажлаас халагдлаа

Өмнөд Солонгосын алдарт дуучин Сон Ши-гён нь 10 гаруй жил хамт ажилласан менежер А-гаас нь санхүүгийн хохирол амссан тухай мэдээлэл таржээ. Тус менежер нь одоогоор ажлаасаа халагдсан байна.

Сон Ши-гёнийн SK Jaewon агентлагаас гаргасан мэдэгдэлд "Ажилдаа байх хугацаандаа менежер А нь компанийн итгэлийг алдсан үйлдэл гаргасныг тогтоосон" гэжээ. Нийт 10 гаруй жил хамтран ажилласан менежер А нь ажлын явцад Сон Ши-гён төдийгүй бусад холбогдох хүмүүс, гадны байгууллагуудад ч мөнгөн хохирол учруулсан болох нь тогтоогдсон байна.

"Бид дотоод шалгалтынхаа үр дүнд асуудлын ноцтой байдлыг ойлгож, учирсан хохирлын хэмжээг нарийвчлан тогтоогоод байна. Одоогийн байдлаар тухайн ажилтан ажлаасаа халагдсан" хэмээн тус агентлагаас тайлбарлажээ.

"Бид удирдлага, хяналтын үүргээ ухамсарлаж, ийм зүйл дахин гарахгүйн тулд дотоод хяналтын системийг шинэчлэн сайжруулж байна. Уран бүтээлчийг маань хайрладаг эрхэм шүтэн бишрэгчдэдээ санаа зовнил учруулсанд гүнээ уучлалт хүсье" гэж нэмж хэлсэн байна.

Солонгосын интернет хэрэглэгчид энэ мэдээллийг сонсоод ихэд гайхаж, бухимдлаа илэрхийлжээ. "10 жил итгэж явсан хүний ийм явдал үнэхээр харамсалтай байна", "Ийм хүмүүстэй хатуу хариуцлага тооцох хэрэгтэй" гэх зэрэг сэтгэгдлүүд бичигджээ.