Жүжигчин Ли Ик-ён хувийн амьдралын талаарх гүтгэлэгтэй тэмцэхээр хуулийн арга хэмжээ авч эхэллээ

Өмнөд Солонгосын жүжигчин Ли Ик-ён нь сүүлийн үед цахим орчинд тархаад буй хувийн амьдралтай холбоотой худал мэдээлэл, гүтгэлэгтэй тэмцэхээр хуулийн арга хэмжээ авч эхэлснээ зарлалаа.

Түүний харьяа агентлаг болох Sangyoung ENT өчигдөр албан ёсоор мэдэгдэл гаргаж, жүжигчний нэр төрийг гутаан доройтуулж буй зохиомол мэдээллүүд болон гүтгэлэгт харамсаж буйгаа илэрхийлсэн байна. Агентлагаас мэдээлснээр, тэд аль хэдийнэ хуулийн багийнхаа тусламжтайгаар холбогдох нийтлэлүүдийг бичсэн болон тараасан хүмүүсийг худал мэдээлэл түгээх, гүтгэх гэмт хэргийн үндэслэлээр Сөүл хотын Каннам дүүргийн цагдаагийн газарт гомдол гаргаж, мэдүүлгээ өгөөд байгаа аж.

Sangyoung ENT компанийн зүгээс энэ асуудалтай холбоотойгоор ямар нэгэн тохиролцоо хийх, нөхөн төлбөр авахаар оролдсон зүйл байхгүй бөгөөд цаашид ч энэ тал дээр ямар нэгэн байдлаар харилцахгүй гэдгээ тодосгожээ. Тэд жүжигчний нэр хүнд, алдар хүндэд халдсан үйлдлүүдийг тасралтгүй хянах болно гэдгээ онцолж, цаашид ямар ч өршөөлгүйгээр хуулийн арга хэмжээг үргэлжлүүлэхээ мэдэгдсэн байна.

Үүнээс өмнө өөрийгөө Герман хүн хэмээн танилцуулсан нэгэн хүн Ли Ик-ёнтой харилцсан гэх мессеж, SNS чатны хуулбаруудыг дэлгэж, түүний хувийн амьдралын талаарх мэдээллийг цацсан ч, хожим нь уг контент нь хиймэл оюун ухааны тусламжтайгаар зохиогдсон болохыг хүлээн зөвшөөрч, асуудал эцэслэсэн юм.

Солонгосын нетизэнчүүд жүжигчнийг дэмжиж, "Агентлаг нь ийн шуурхай арга хэмжээ авч байгаад баяртай байна!", "Үнэнийг гутаагчдад бүү өршөө! Ли Ик-ён-ийг хамгаалцгаая!" болон "Өнөө үед хуурамч мэдээлэл их байна, түүнд хохирол болохгүй байхыг хүсье" хэмээн сэтгэгдэл үлдээжээ.