Сон Жэ-римийн сүүлчийн бүтээл "Алс ба ойрхон" кино нээлтээ хийнэ

Сон Жэ-римийн сүүлчийн уран бүтээл болох "Алс ба ойрхон" (Distance of a Wish) кино энэ арванхоёрдугаар сард үзэгчдийн хүртээл болох гэж байна. Тус кино нь өнгөрсөн жил "Чунмуро" богино хэмжээний болон бие даасан кино наадамд шилдэг кино бүтээсний төлөө шагнал хүртэж, өндөр үнэлгээг авсан юм.

Өнгөрсөн арванхоёрдугаар сард бурхан болсон жүжигчин Сон Жэ-римийн "Алс ба ойрхон" кинонд оруулсан сүүлчийн дүрийг үзэх боломжтой нь энэхүү бүтээлийг илүү чухалыг илтгэнэ. Сон Жэ-рим энэ киногоороо нэгэн зэрэг хоёр дүрд тоглож, жүжигчний авьяасаа харуулсан бөгөөд тэрээр хайртыг хайж буй Жуно ( жүжигчин Пак Хо-сан)-гийн бааранд ирдэг Дон-сок, Дон-сү гэх хоёр эрэгтэй дүрийг бүтээжээ.

Сон Жэ-рим нь өнгөрсөн арванхоёрдугаар сард Сөүлийн Сонгдонг-гу дүүрэгт байрлах гэрээсээ нас барсан байдалтай олдсон билээ. Түүнтэй хамт тоглосон жүжигчин Пак Хо-сан "Чи ийм гэрэл гэгээтэй байсан шүү дээ. итгэж өгөхгүй нь. Чамайг харж хандаж чадаагүй уучлаарай" хэмээн харамсал илэрхийлсэн.

"Алс ба ойрхон" киноны нээлт арванхоёрдугаар сарын 3-нд болно.

Солонгосын интернэт хэрэглэгчид Сон Жэ-римийн сүүлчийн киногоо үзэх боломжтой болсондоо баярлахын зэрэгцээ түүнийг үгүйлж буйгаа илэрхийлжээ. "Түүний сүүлчийн бүтээлийг үзэхээр тэсэн ядан хүлээж байна, гэхдээ үнэхээр харамсалтай байна", "Тэр бол маш авьяаслаг жүжигчин байсан, бид түүнийг ихэд санана", "Түүний гэр бүлд эмгэнэл илэрхийлье" гэх зэрэг сэтгэгдлүүдийг үлдээжээ.