“К-поп: Демон Хантэрс” дахин ирж байна: Netflix дараагийн ангийг баталгаажууллаа!
K-pop ертөнцийг хайрлагчдад гайтай мэдээ ирлээ!
Netflix болон Sony Pictures компаниуд хамтын бүтээл болох “К-поп: Демон Хантэрс” (K-Pop: Demon Hunters) хүүхэлдэйн киноны үргэлжлэлийг хийхээр болсноо албан ёсоор зарлалаа. Хөгжмийг зэвсэг болгон чөтгөрүүдтэй тулалдаж, ертөнцийг авардаг Huntrex хамтлагийн шинэ адал явдлыг хүлээж авахад бэлэн байгаарай.
Хоёр дахь анги нь 2029 онд нээлтээ хийхээр төлөвлөгдсөн ч, хүүхэлдэйн киноны урт удаан үйлдвэрлэлийн хугацааг харгалзан энэ хугацаа өөрчлөгдөх боломжтойг эх сурвалжууд онцолж байна. Одоогийн байдлаор бүтээлийн талаархи дэлгэрэнгүй мэдээлэл, төлөвлөгөөг ярилцаж байгаа юм.
“К-поп: Демон Хантэрс” нь K-pop супер одод болох Huntrex (Луми, Мира, Жои) хамтлагийн тухай өгүүлдэг бөгөөд тэд өөрсдийн хөгжмийн авьяасаа ашиглан чөтгөрүүдтэй тулалдаж, ертөнцийг авардаг уран зөгнөлт адал явдалт хүүхэлдэйн кино юм. Энэ оны зургаадугаар сард нээлтээ хийсэн даруйдаа дэлхий даяар маш их алдартай болж, Netflix-ийн киноны төрөлд 300 сая гаруй үзэлттэйгээр дээд амжилт тогтоосон. Huntrex хамтлагийн дуулсан "Golden" дуу АНУ-ын Billboard Hot 100 болон Их Британийн Official Charts чартуудад нэгдүгээр байранд шалгарч, хүүхэлдэйн киноны саундтракийн хувьд түүхэн амжилт үзүүлсэн.
Найруулагч Мегги Канг болон хамтран найруулагч Крис Аппельханс нар өмнө нь BBC-д өгсөн ярилцлагадаа "Бид энэ баатруудтай хийх зүйл маш их байна гэдэгт итгэдэг" хэмээн хэлж байсан бөгөөд үргэлжлэлийг хийх боломжтойг илтгэж байсан. Тэд "Дараагийн ангид шинэ тайз, шинэ хөгжим нэмэгдэнэ" хэмээн онцолжээ.
Үүнээс гадна, "К-поп: Демон Хантэрс"-ийн албан ёсны поп-ап аялал энэ оны арванхоёрдугаар сарын 4-28-ны хооронд Сөүл хотын Сонгсудон дүүрэгт зохион байгуулагдах бөгөөд дараа нь Сингапур, Бангкок, Токио, Тайпэй зэрэг Азийн бусад томоохон хотуудад үргэлжлэх юм. Фэнүүд Huntrex хамтлагийн тайз болон киноны ертөнцийг биечлэн мэдрэх боломжтой болно.
Солонгосын интернэт хэрэглэгчид энэ мэдээнд маш их баярлаж байна. "Huntrex-ийг эргэн ирэхийг тэсэн ядан хүлээж байсан шүү!", "Жилийн хамгийн шилдэг мэдээ, хоёрдугаар анги нь бүр ч илүү гайхалтай байх байх!". "Хамтлагийн хоорондын харилцаа, шинэ дуунууд их сонирхолтой байх болно" гэх зэрэг сэтгэгдлүүд олноор бичигджээ.