TXT-ын Ёнжун анхны бие даасан цомог 'NO LABELS: PART 01'-ыг гаргалаа
Алдартай хамтлаг TOMORROW X TOGETHER (TXT)-ын гишүүн Ёнжун өнөөдөр буюу 7-р сарын 7-нд анхны бие даасан цомог болох 'NO LABELS: PART 01'-аа гаргалаа. Энэ нь түүний DEBUT хийснээс хойш 6 жил 8 сарын дараа гарч буй анхны бие даасан уран бүтээл юм.
'NO LABELS: PART 01' цомог нь Ёнжуныг ямар нэгэн тодотгол, хязгаарлалтгүйгээр, тэр чигээр нь харуулах зорилготой. Цомогт 'Talk to You' хэмээх гол дуу, мөн 'Forever', 'Let Me Tell You (feat. Daniela of KATSEYE)', 'Do It', 'Nothin’ ’Bout Me', 'Coma' зэрэг нийт зургаан дуу багтсан. Ёнжун 'Forever' дууг эс тооцсон таван дууны шүлгийг бичсэн бөгөөд гол дуу болон 'Nothin’ ’Bout Me' дууны ая зохиоход оролцжээ.
'Talk to You' дуу нь хоёр хүний хоорондох хүчтэй таталцал, үүнээс үүдэлтэй хурцадмал байдлыг өгүүлдэг. Энэ нь гитарын сэтгэл татам аялгуу, эрч хүчтэй бөмбөрийн дуу, Ёнжуны баргил хоолойгоор онцлогдсон хард рок жанрын бүтээл юм. MegaCrew-тэй хамтран хийх түүний үзүүлбэр нь асар том цар хүрээ, гүн гүнзгий сэтгэгдэл төрүүлж, тайзан дээрх өөриягүй байдлыг илтгэх нь дамжиггүй.
Big Hit Music-д өгсөн ярилцлагадаа Ёнжун цомгийнхоо талаар сэтгэгдлээ хуваалцжээ. Тэрээр өөрийн жинхэнэ дүр төрхийг харуулах боломж олдож байгаадаа баяр хөөртэй байгаагаа илэрхийлсэн бөгөөд дуу, үзүүлбэр, бусад бүх зүйлд идэвхтэй оролцож, хичээл зүтгэл гаргаснаа онцолсон. Тэрээр ялангуяа 'Coma' дууны бүжгийн хөдөлгөөнийг бүтээхэд оролцсондоо сэтгэл хангалуун байгаагаа дурдаад, үзүүлбэрийг нь үзээд 'Ёнжун галзуурчээ' гэж бодох байх хэмээн найдаж байгаагаа илэрхийлэв.
'KATSEYE-ын Даниелатай хамтран ажиллах боломж гарсанд би маш их баяртай байна. Тэр бол миний хувьд үргэлж маш сайн уран бүтээлч байсан' хэмээн Ёнжун онцолжээ. Тэрээр цомогтой холбоотой гол контентуудыг өөрийн хувийн SNS хаягаараа дамжуулж байсан нь өөртэй нь илүү ойр дотно байдлыг бий болгож, сонирхолтой байсан гэдгийг нэмж хэлсэн.
Эцэст нь Ёнжун өөрийн шүтэн бишрэгч MOA-д хандаж 'Удаан хүлээсэн та бүхэндээ энэ цомог хүлээсэн цаг хугацааг тань үнэ цэнэтэй болгоно гэдгийг амлаж байна. Өөрийнх нь хэвээр мэдэрч, зугаагаа гаргаарай. Үргэлж талархаж, хайрладаг шүү!' гэж захив.
БНСУ-ын сүлжээний хэрэглэгчид Ёнжуны бие даасан дебютыг маш өндрөөр үнэлж байна. Түүний 'NO LABELS: PART 01' цомгийн дуулах арга барил, өвөрмөц стилийг магтаж, түүний тайзны үзүүлбэрийг тэсэн ядан хүлээж байгаагаа илэрхийлжээ.