дууны од Хёна тайзнаас унаж, хуучин өвчинг нь дахин санууллаа

Алдарт дуучин Хёна "Waterbomb 2025 Macau" арга хэмжээний үеэр тайзнаас унаж, түүний өмнө нь вазовагал синкоп буюу мэдрэлийн гаралтай ухаан алдах өвчинтэй тэмцэж байсан түүх дахин анхааралд өртлөө.

Зургадугаар сарын 9-нд Макао хотод болсон уг арга хэмжээний үеэр Хёна "Bubble Pop!" зэрэг өөрийн хит дуунуудаа дуулж байхдаа гэнэт бие нь муудаж, ухаан алдан тайзнаа унасан байна.

Хамт байсан бүжигчид нь түүнийг түргэн дэмжин, нөхцөл байдлыг шалгаж, аюулгүй байдлыг нь хангах арга хэмжээг авчээ. Үзэгчдийг цочирдуулсан энэ явдлыг гэрэл зураг, видео бичлэгт буулгаж, цагдаа нар тайзан дээр гарч ирэн Хёнаг гаргаж авч байсныг харсан юм.

Хёна өөрийн цахим хуудсандаа "Намайг уучлаарай. Би та бүхэндээ сайхан байдлаа харуулахыг хүссэн боловч мэргэжлийн бус байдал гаргалаа. Үнэндээ би юу болсныг огт санахгүй байгаа ч та бүхэнтэй хуваалцахыг хүссэн юм" хэмээн бичжээ. Тэрээр мөн "Цаашид эрч хүчээ нэмэгдүүлж, хичээл зүтгэл гаргах болно" гэж амласан.

Хёна 2020 онд вазовагал синкоп оношлогдож, түр хугацаагаар уран бүтээлээсээ завсарлага авч байсан билээ. Энэ өвчин нь стресс, ядаргаа, хэт их жин хасах, шингэн дутагдсанаас болж цусны даралт болон зүрхний цохилт гэнэт буурч, улмаар түр хугацаагаар ухаан алддаг шинж тэмдэг юм.

Өнгөрсөн жил ч Хёна "Би тайзан дээр сайн тоглохын тулд гоё биетэй болохыг хүссэн ч тайзан дээр унадаг байсан. Би сард 12 удаа унадаг байсан" хэмээн хэт их турдаг байснаа нуулгүй хэлж байв.

Саяхан Хёна нэг сарын дотор 10 кг орчим жин хассанаа зарлаж, 49 кг жинтэйгээ харуулсан жингийн машины зургийг хуваалцаж, "40-өөс дээш болгох нь үнэхээр хэцүү байна. Би одоо ч хол байна. Хим Хёна, Хёнаааа!!!! Би тэр үед хэр их иддэг байсан бэ!!!!" хэмээн бичжээ.

10 кг-аас дээш жин хассан Хёна үүгээр зогсолгүй, Макаогийн "Waterbomb"-д оролцохоор бэлтгэлээ базааж, тураах эрмэлзлээ улам бүр бадраасан байна.

Интернэт хэрэглэгчид "Бие чинь хамгийн чухал", "Эрүүл мэндээ алдвал бүгдээ алддаг", "Фэнүүдийн хувьд тайзны тоглолтоос илүү Хёнагийн аюулгүй байдал чухал" гэх зэрэг дэмжлэгийн үгсийг илгээжээ.

Сануулахад, Хёна өнгөрсөн жил дуучин Ён Жүн-хёнтой гэрлэсэн юм.

Вазовагал синкопе нь хамгийн түгээмэл тохиолддог ухаан алдах хэлбэр юм. Энэ нь хүчтэй стресс, айдас, өвчин, удаан зогсолт, тэр ч байтугай цус алдах зэрэг тодорхой шалтгаанаас үүдэлтэй. Энэ нь ихэвчлэн залуу хүмүүст тохиолддог бөгөөд зүрхний ноцтой өвчний шинж тэмдэг биш боловч, ялангуяа олон нийтийн өмнө гардаг хүмүүст анхаарал, болгоомж шаарддаг.