K-POP дуучин Хёна тайзнаа ухаан алдлаа: эрүүл мэндийн асуудлууд дахин сөхөгдөв
Алдарт Солонгос дуучин Хёна (HyunA) энэ сарын 9-нд БНХАУ-ын Макао хотод болсон "Waterbomb 2025 Macau" тоглолтын үеэр тайзнаа ухаан алдан унаж, үзэгчдийг цочирдууллаа. Тэрээр "Bubble Pop" дууг дуулж байхдаа гэнэт таталдаж, бие нь тэнцвэрээ алдан унасан байна. Тайзны хамгаалагчид болон бүжигчид яаралтай тусламж үзүүлэн тайзнаас гаргажээ. Үзэгчид гайхаж, санаа зовсон байдалтай байв.
Тоглолтын дараа Хёна өөрийн цахим хуудсаараа дамжуулан "Та бүхэндээ сайхан байдлаа харуулахыг хүссэн ч чадсангүйдээ маш их харамсаж байна. Юу болсноо сайн санахгүй байна. Цаашид эрүүл мэнддээ илүү анхаарах болно" хэмээн мэдэгдсэн.
Хёнад ийм явдал тохиолдож буй нь энэ удаад анх удаа биш юм. Тэрээр 2020 онд "вазовагал синкопе" буюу мэдрэлийн улмаас үүдэлтэй түр зуурын ухаан алдалтын оношлогоо авч, уран бүтээлээ тодорхой хугацаагаар завсарлаж байсан билээ. Энэ өвчин нь ядаргаа, стресс, биеийн усны дутагдал, гэнэт жин хасах зэргээс шалтгаалж цусны даралт болон зүрхний цохилт гэнэт буурч, тархинд очих цусан хангамж багасах үед хүн түр хугацаанд ухаан алддаг юм.
Тухайн үед түүний агентлагаас "Хёна сэтгэл гутрал, айдас түгшүүрийн хам шинж, мөн вазовагал синкопе өвчнөөр шаналж байна. Эмчилгээ хийлгэж байсан ч ухаан алдах нь давтагдсаар байсан тул үйл ажиллагааг түр зогсоосон" хэмээн мэдэгдэж байв. Хёна өөрөө ч "Эхэндээ нүдний өмнө бүрхэж, дараа нь унаад өгсөн. Шинжилгээ хийлгэсний эцэст энэ өвчнийг мэдсэн" хэмээн ярьж байжээ.
Өнгөрсөн жил тэрээр хэвлэлд өгсөн ярилцлагадаа "Тайзан дээр сайн тоглохын тулд сард 12 удаа ухаан алддаг байсан" хэмээн хэт их туралтаас болж эрүүл мэнд нь муудсан тухайгаа дурдсан юм. Саяхан тэрээр нэг сарын дотор 10 кг жин хассан талаар дурдаад "49 кг болтол туслаа" гэж ярьсан.
Интернэт хэрэглэгчид "Эрүүл мэнд нь хамгийн чухал", "Хёнагийн тоглолт гайхалтай ч аюулгүй байдал нь илүү чухал", "Биеийнхээ дохиог бүү үл тоомсорлоорой" гэх зэргээр дэмжлэг илэрхийлж байна.
Үүнээс гадна Хёна өнгөрсөн жил дуучин Ён Жун-хёнтой гэрлэсэн билээ.
Солонгосын нетизенчүүд Хёнагийн эрүүл мэндийн байдалд ихээхэн санаа зовниж буйгаа илэрхийлжээ. Олон хүн түүнийг тайзны амжилтаас илүүтэй өөрийн биеийн байдалд анхаарахыг уриалж байна. "Тун удахгүй эдгэрнэ гэдэгт найдаж байна" эсвэл "Түүний эрүүл мэнд хамгийн чухал" гэх мэт сэтгэгдлүүд ихээр тархаж байна.