Хан Хе-жингийн YouTube суваг хакерт өртөж, устгагдлаа: 860K дагагчтай сувгийн эмгэнэлт хувь

Өмнөд Солонгосын алдарт модель, жүжигчин Хан Хе-жингийн YouTube суваг хакерт өртөж, улмаар устгагдсан харамсалтай хэрэг гарчээ. Тус суваг нь 860 мянга орчим дагагчтай бөгөөд голчлон гоо үзэсгэлэн, амьдралын хэв маягийн контентыг нийтэлдэг байжээ.

11-р сарын 10-ны өглө болоход, Хан Хе-жингийн суваг дээр 'CEO Брэд Гарингхаусын өсөлтийн таамаглал' хэмээх нэртэй, крипто валютын талаарх шууд дамжуулалт гарч, үзэгчдийг цочирдуулсан байна. Энэхүү контент нь Хан Хе-жингийн өмнөх бүтээлүүдээс тэс өөр, зөвхөн криптовалютын зах зээл болон хөрөнгө оруулалтын тухай байжээ.

Шууд дамжуулалтын үеэр сэтгэгдэл бичих боломж хязгаарлагдсан байсан бөгөөд үүнийг анзаарсан хүмүүс түүний сошиал хуудсуудад "Эгч ээ, YouTube суваг тань эвдрээд байна уу", "Сонин Риппл нэвтрүүлэг орчихлоо", "Одоо суваг нь алга болчихлоо!" хэмээн түгшүүртэй мессежүүдийг илгээжээ.

Удалгүй суваг руу нэвтрэх гэсэн хүмүүс "YouTube-ийн нийтлэг журмыг зөрчсөний улмаас устгагдсан" гэсэн мэдэгдлийг л харах боломжтой болсон байна. Ийнхүү 860 мянган дагагчтай Хан Хе-жингийн суваг бүрэн устаж үгүй болжээ.

Хан Хе-жин өөрийн цахим хуудсаараа дамжуулан "11-р сарын 10-ны өглөө миний суваг дээр криптовалютын талаарх шууд дамжуулалт болсныг мэдсэн. Одоогоор YouTube-д гомдол гаргаад, сувгийг сэргээлгэх бүх арга хэмжээг авч байна. Энэ нэвтрүүлэг нь надад болон миний багт ямар ч хамаагүй бөгөөд хэн нэгэнд хохирол учруулаагүй гэж найдаж байна. Хийж бүтээсэн контентоо ийм амархан алдсандаа маш их харамсалтай байна. Санаа зовоосондоо уучлал хүсч, сувгийг сэргээхийн тулд хичээх болно" гэсэн албан ёсны мэдэгдлийг хийжээ.

Солонгосын интернэт хэрэглэгчид "860K дагагчтай суваг нэг шөнийн дотор алга болно гэж байхгүй", "Контент бүтээхэд чин сэтгэлээсээ ханддаг байсан, заавал сэргээгдэнэ гэж найдаж байна", "YouTube-ийн дансны аюулгүй байдлын системийг сайжруулах цаг нь болжээ" зэрэг сэтгэгдлүүдээр дэмжлэгээ илэрхийлжээ.