NCT DREAM-ийн 'THE DREAM SHOW' аялал 100 дахь тоглолтоо хийхэд бэлэн боллоо
SM Entertainment-ийн алдартай K-pop хамтлаг NCT DREAM өөрсдийн бие даасан концертынхоо 100 дахь тоглолтоо хийхэд гуравхан хоног үлдлээ. Энэхүү түүхэн үйл явдал нь тэдний "2025 NCT DREAM TOUR 'THE DREAM SHOW 4 : DREAM THE FUTURE'" аялалтын хүрээнд 11-р сарын 14-нд Япон улсын Saitama Super Arena-д болох эхний тоглолтоор тохионо.
"THE DREAM SHOW" брэнд нь 2019 онд Сөүл хотод анх эхэлснээс хойш NCT DREAM-ийн өсөлт, хөгжлийг тодорхойлох нэгэн том хүчин зүйл болсон юм. 2022 онд "THE DREAM SHOW2 – In A DREAM" тоглолт нь өмнөхөөсөө 5 дахин том талбай дээр зохион байгуулагдаж, хамтлагийн нөлөөллийг харуулж байв. Үүнээс гадна, "THE DREAM SHOW2"-ын анкор тоглолтууд нь БНСУ-ын хамгийн том доторх тоглолтын талбай болох Gocheok Sky Dome-д 12 удаа болж, бүх тасалбарыг нь борлуулж, "K-pop-ын шилдэг төлөөлөл" гэдгээ баталгаажуулсан.
NCT DREAM нь зөвхөн Солонгос төдийгүй Хойд Америк, Өмнөд Америк, Европ, Азийн олон орноор аялан тоглолт хийж, дэлхийн хэмжээний уран бүтээлч болж чадсан. Ялангуяа "THE DREAM SHOW 4" аялалын үеэр Хонконгийн хамгийн том цэнгэлдэх хүрээлэн болох Kai Tak Stadium-д K-pop уран бүтээлчдээс анх удаа бие даасан тоглолт хийсэн нь онцгой юм. Мөн Тайландын Rajamangala National Stadium, Жакартагийн цэнгэлдэх хүрээлэнд хоёр жил дараалан амжилттай тоглолт хийгээд зогсохгүй, 12-р сард Тайваний хамгийн том доторх талбай болох Taipei Dome-д тоглохоор төлөвлөж байгаа нь тэдний глобал нөлөөг улам бэхжүүлж байна.
"THE DREAM SHOW" аялал нь NCT DREAM-ийн мөрөөдөл, өсөлтийг харуулсан тайз бөгөөд дэлхийн фэнүүдтэй хамт бүтээсэн бэлгэдлийн ач холбогдолтой тоглолт юм. 2019 оноос хойш 100 дахь тоглолтдоо хүрэх хүртлээ тэд байнга шинэ зүйлийг эрэлхийлж, өөрсдийн онцгой тоглолтын ертөнцийг бүрдүүлж ирсэн. Тэд 100 дахь тоглолтоос цааш улам том тайз руу тэмүүлсээр байх нь дамжиггүй.
NCT DREAM нь 11-р сарын 14-16-нд Сайтама, 12-р сарын 6-нд Тайпей, 12-р сарын 13-14-нд Куала-Лумпур, ирэх оны 1-р сарын 8-10-нд Осака, 1-р сарын 24-25-нд Нагоя хотуудад "THE DREAM SHOW 4 : DREAM THE FUTURE" тоглолтоо үргэлжлүүлнэ. Мөн тэдний зургаа дахь мини цомог "Beat It Up" нь 11-р сарын 17-нд цацагдах болно.
NCT DREAM-ийн шүтэн бишрэгчид 100 дахь тоглолтоо хийж байгааг нь маш ихээр дэмжиж, "100 удаагийн тоглолт гэдэг үнэхээр гайхалтай амжилт! NCT DREAM бол жинхэнэ тайзны эздүүд. Тэдний цаашдын аялалд нь амжилт хүсье!" гэх мэт сэтгэгдлүүдийг үлдээжээ.