EXO хамтлагийн гишүүн асан Крис нас барсан тухай цуурхлыг Хятадын цагдаа няцаалаа
БНХАУ-д бэлгийн хүчирхийллийн хэргээр ял эдэлж буй EXO хамтлагийн гишүүн асан Крис (Ву Ифань)-ийн нас барсны тухай цуу яриа хил дамнаж тархаад байсан бөгөөд үүнийг тус улсын цагдаагийн байгууллага албан ёсоор няцаалаа.
Тухайлбал, Хятадын олон нийтийн сүлжээ болон Тайванийн хэвлэл мэдээллийн хэрэгслээр ташаа мэдээлэл эрчимтэй тархсан бөгөөд "Крис шоронд нас барсан", "Хамтын бэлгийн хүчирхийллийн дараа алуулсан", "Удаан хугацааны өлсгөлөнгөөр нас барсан" гэх зэрэг худал цуурхлууд гарч байсан юм.
Энэхүү худал мэдээллийн тархалтыг зогсоохын тулд Хятадын Жиансу мужийн цагдаагийн газраас албан ёсны Weibo хуудсаараа дамжуулан няцаалт хийв. Цагдаагийн байгууллагаас цуу яриатай хамт нийтлэгдсэн Крис шоронд байгаа зургийг "хуурамч", "өмнөх мэдээний хуудсыг ашиглан, орчны хүний царайг Крис-ээр сольсон", "зохиомол зураг" хэмээн баталгаажууллаа.
Одоогоор Хятадын эрх баригчид Крис-ийн биеийн байдлын талаар албан ёсны байр суурь илэрхийлээгүй ч цагдаагийн байгууллагаас ийнхүү шууд оролцож, хуурамч зургийг баталгаажуулж, цуурхлыг няцаасан нь нэн ховор тохиолдол гэж онцолж байна. Зарим хэвлэл мэдээллийн байгууллага худал мэдээлэл тараасан тохиолдолд хуулийн хариуцлага хүлээх тухай анхааруулга өгч, цуурхлыг түгээхгүй байхыг уриалж байна.
Крис нь 2012 онд EXO хамтлагийн гишүүнээр гараагаа эхэлж байсан бөгөөд 2014 онд SM Entertainment-аас гарсны дараа БНХАУ руу шилжин жүжигчин, дуучнаар ажиллаж байсан. 2020 онд түүнийг согтуурсан эмэгтэйчүүдийг хүчиндсэн хэргээр буруутгаж, 2023 онд шүүхээс 13 жилийн хорих ял оноож, одоогоор БНХАУ-ын шоронд ял эдэлж байгаа юм. Ялаа эдлээд дууссаны дараа түүнийг төрсөн нутаг Канадад нь албадан гаргах юм.
Хятадын интернэт хэрэглэгчид цагдаагийн байгууллагын няцаалтад харилцан адилгүй хандлаа. Зарим нь сэтгэл амарч, цуурхал байсныг баталлаа хэмээн баярлаж байхад, зарим нь худал мэдээлэл тараагчдыг буруутгаж байна. "Ямар ч байсан үнэн нь тогтоогдлоо", "Худал мэдээлэл цаг хугацаа үрсэн байна" зэрэг сэтгэгдлүүд олон байна.