Им Юүна <Allure Korea> сэтгүүлийн нүүрэнд шинэ үс засалтаараа гайхагдлаа

Өмнөд Солонгосын нэрт жүжигчин Им Юүна <Allure Korea> сэтгүүлийн арванхоёрдугаар сарын дугаарын нүүрэнд зургаа авахууллаа. Тэрээр саяхан дууссан <The Tyrant's Chef> драмадаа өөрийн гүн гүнзгий жүжиглэлтээр үзэгчдийг байлдан дагуулсан билээ.

Өдгөө тэрээр урт үсээрээ алдартай ч энэ удаагийн зураг авалтын хувьд зоригтой шинэчлэлт хийж, богино үс засалтаар гоо үзэсгэлэнгээ тодотгосон нь түүнийг илүү боловсронгуй, эмэгтэйлэг харагдуулж байлаа. Шинэ стилистэйгээ танилцахдаа тэрээр маш их баяр хөөртэй байсан бөгөөд камерны өмнө илүү чөлөөтэй, итгэл төгс байдлаа харуулсан гэдэг.

Энэхүү зураг авалтыг Им Юүнагийн удаан хугацааны хамтрагч, тансаг зэрэглэлийн үнэт эдлэлийн брэнд болох Qeelin-тэй хамтран зохион байгуулжээ. Энэ удаагийн гоёл чимэглэл нь аз авчрах утгыг агуулсан Wulu цуглуулга бөгөөд шинэ жилийн дулаахан уур амьсгал, тансаг чанарыг төгс хослуулсан нь онцлог юм.

Солонгосын интернэт хэрэглэгчид түүний шинэ дүр төрхийг ихэд магтжээ. "Юүна хэзээд гайхалтай харагддаг", "Богино үс түүнд үнэхээр зохижээ, маш загварлаг байна!" гэсэн сэтгэгдлүүд олон байлаа.