"World of Street Woman Fighter 3"-ийн ялагч "Osaka JoJoGang" хамтлаг татан буугджээ!

Mnet телевизийн "World of Street Woman Fighter 3" (Свупа 3) шоуны ялагч "Osaka JoJoGang" хамтлаг албан ёсоор тарсан тухайгаа зарлалаа. Энэ тухай хамтлагийн гишүүн Кёка арваннэгдүгээр сарын 16-нд өөрийн сошиал хуудсаараа дамжуулан мэдэгдэл хийсэн байна. Тэрээр энэхүү мэдэгдлийг солонгос, япон, англи хэлээр нийтэлжээ.

Кёка "Бид арваннэгдүгээр сарын 22-нд Сувон хотод болох тоглолтоос өмнө хамтлагийн үйл ажиллагаагаа зогсоож, татан буугдана" хэмээн мэдэгдсэн байна. Тэрээр "Хамтлагийн 7 гишүүн бүгд зөвлөлдсөний үндсэн дээр, багийн бүтэц, цаашдын чиглэлээ өөрчлөхөөр тохиролцсон" гэж нэмж хэлжээ.

"JoJoGang" нь "World of Street Woman Fighter 3" шоуны төлөө байгуулагдсан баг байсан юм. "6 гишүүн арваннэгдүгээр сарын 22-нд болох тоглолтоос хойш бүх үйл ажиллагаагаа дуусгаж, тэр өдөр багийг орхих болно" гэж тэрээр тайлбарлалаа.

"JoJoGang-ийн үйл ажиллагаа өндөрлөж байгаа ч гишүүд тус тусын тайзнаа гарах болно" хэмээн Кёка хэлсэн бөгөөд "Энэ бүх явдлаас болж фенүүд болон хамтран зүтгэгчдэд санаа зовнил, түгшүүр учруулсан бол гүнээ уучлалт хүсье" хэмээн онцолжээ.

"Свупа 3"-ын ялагч "Osaka JoJoGang" хамтлаг нь удирдагч Ибуки болон бусад 6 гишүүний мөнгө төлбөртэй холбоотой маргаан, менежерийн зүгээс үйлдсэн гэх буруутай үйлдэл, мөн мөнгө завшсан хэргүүдтэй холбоотой асуудалд нэр холбогдож байсан юм.

Солонгосын интернэт хэрэглэгчид "Osaka JoJoGang" хамтлагийн тарсан тухай мэдээнд харамсаж байгаагаа илэрхийлжээ. "Маш их харамсалтай байна, тэд маш хүчтэй байсан шүү!", "Гишүүд бүгдээрээ амжилттай яваарай" гэх сэтгэгдлүүд олон нийтийн сүлжээнд бичигдэж байна.