CATSSEYE хамтлаг онлайн заналхийлал, айдас хүйдлээ хуваалцлаа
Саяхан Грэммийн шилдэг шинэ уран бүтээлчээр нэр дэвшсэн CATSSEYE хамтлаг цахим орчны харгислалтай тэмцэж буй хүндрэлээ хуваалцлаа. BBC-д өгсөн ярилцлагадаа тэд өнгөрсөн жилээс хойш олон удаа үхлийн аюул заналхийлсэн захидлууд авч байснаа дэлгэжээ.
"Би үл тоомсорлож байгаа мэт жүжиглэхийг хичээдэг ч, нэг мянга гаруй хүн надад үхлийн заналхийлсэн захидал илгээхэд цочирддог" хэмээн Лара хэлсэн байна. "Үнэндээ болохгүй гэдгийг мэдэж байсан ч энэ нь маш их сэтгэлийн дарамт болдог."
Энэтхэг гаралтай Америк хүн болох Лара нь үндсэрхэг үзлийн дарамттай нүүр тулаад зогсохгүй, ICE (АНУ-ын цагаачлал, гаалийн хяналтын газар)-т хуурамчаар 'хууль бусаар АНУ-д оршин сууж, ажилладаг' гэх мэдүүлэгт өртжээ.
"Би бусад хүмүүсийн санаа бодлыг бүгдийг нь хүлээж авах шаардлагагүй гэдгийг ойлгосон" хэмээн тэрээр тэмдэглээд, сөрөг сэтгэгдлээс зайлсхийхийн тулд "Twitter (X) хаягаа устгасан" гэв.
Софиа мөн "Манай замналын хувьд богино хугацаа ч, бид болон манай гэр бүлийнхэн аль хэдийнэ маш их зүйлийг туулсан. Биднийг олон нийтэд гарахаар шийдсэнийг хүлээн зөвшөөрнө. Алдар нэрийн нэг хэсэг гэдгийг ч ойлгоно. Гэхдээ энэ нь бид хүн биш гэсэн үг биш юм" гэдгийг онцолжээ.
Лара "Хүмүүс биднийг зөвхөн эмэгтэйчүүд гэж хардаг, тэд биднийг чансаагаар нь үнэлдэг. Үзэсгэлэнтэй байдал, дуулах, бүжиглэх чадварыг нь үнэлж, түүнийг нь хувиар илэрхийлдэг. Энэ бол жинхэнэ дистопи" хэмээн ярьж, Манон "Энэ нь маш их сэтгэцийн дарамттай" гэж нэмж хэлжээ.
HYBE болон Geffen Records-ийн хамтарсан CATSSEYE охидын хамтлаг ирэх хоёрдугаар сарын 1-нд болох 68 дахь удаагийн Грэммийн шагнал гардуулах ёслолд 'Шилдэг шинэ уран бүтээлч' болон 'Шилдэг поп хамтарсан/бүлгийн үзүүлбэр' гэсэн хоёр төрөлд нэр дэвшсэн амжилтад хүрчээ. Шагнал гардуулах ёслолоос өмнө тэд арван гурван хотод арван зургаан удаагийн тоглолтоор хийх анхны бие даасан Хойд Америкийн аялан тоглолтоо арван тавнаас эхлүүлнэ.
Солонгосын интернэт хэрэглэгчид "Тэд ийм зүйлтэй тулгарсан нь үнэхээр аймшигтай байна", "CATSSEYE, эрч хүчтэй байгаарай!" "Гэмт этгээдүүдийг олж, шийтгэнэ гэдэгт найдаж байна" зэрэг сэтгэгдлүүдээр дэмжлэгээ илэрхийлж, тэднийг өмөөрчээ.