Пэ Ён-ун эргэн ирлээ: "Антарктидын тогооч" нэвтрүүлгээр Өмнөд туйл руу зорчлоо
Алдартай тогооч Пэ Ён-ун (Baek Jong-won) "Антарктидын тогооч" (Namgeuk-ui Chef) нэртэй шинэ нэвтрүүлгээрээ үзэгчдийн хүртээл болохоор бэлэн боллоо.
17-нд гарах нэвтрүүлгийн эхний ангид Өмнөд туйлын Сэжонгийн эрдэм шинжилгээний төвд хүрэх хүртэлх тэдний төсөөлж байснаас ч хүнд хэцүү аялал, Өмнөд туйлын хатуу ширүүн ёс жаягийг үзүүлнэ.
Энэ удаагийн аялалд Пэ Ён-ун, жүжигчин Им Су-хян (Lim Su-hyang), EXO хамтлагийн гишүүн Сухо (Suho), жүжигчин Чэ Жон-хёп (Chae Jong-hyeop) нар хамтран оролцож, Уур амьсгалын өөрчлөлтийг судалж буй эрдэмтэн судлаачдыг дэмжихээр Өмнөд туйл руу зорьжээ.
"Буфет рестораны охин" гэгдэг Им Су-хян өөрийн өндөр мэдрэмжтэй амтаараа туслах тогоочийн үүргийг гүйцэтгэнэ.
"Өдөрт 100 ширхэг лууван хэрчинэ" хэмээн ярьж байсан Сухо, хүлээгдэж байснаас өөр ондогоо гаргаж, "Шантрашгүй Сухо" (Yeoljeongmansuho) хэмээх хочийг авч, инээдийг барлаа.
Өөрийн анхны бодит нэвтрүүлэгтээ оролцож буй Чэ Жон-хёп, өөрийн бие бялдрын онцлогоороо гал тогоонд тасралтгүй ажиллаж, "Бүхнийг чадагч отгон гишүүн" (universial maknae) байх болно гэдгээ харуулна.
Хамгийн ахмад нь болохын хувьд хариуцлагаа ухамсарлаж буй Пэ Ён-уны хамт тэд Өмнөд туйлд ямар хамтын ажиллагааг харуулах нь анхаарал татаж байна.
Үүний өмнө Пэ Ён-ун нь энэ оны эхээр гарал үүслийн талаарх хуурамч сурталчилгаа, газар тариалангийн хууль, хүнсний аюулгүй байдал, шошгололтын хуулийг зөрчсөн хэргээр шуугиан тарьж байсан билээ. Тэрээр 5-р сард бүх телевизийн үйл ажиллагаагаа зогсоож, бизнесийн шинэчлэл хийх болон өөрийгөө боловсронгуй болгох хугацааг өнгөрүүлсэн.
Пэ Ён-уны эргэн ирэлтэд олон нийтийн хандлагыг харгалзан MBC телевиз 15-нд "Антарктидын тогооч" нэвтрүүлгийн дахин үзэх үйлчилгээг үзүүлэхгүй гэдгээ мэдэгдсэн.
Маргаантай байдлын дунд гарах гэж буй "Антарктидын тогооч" нэвтрүүлэг нь даваа гараг бүрийн 22:50 цагт цацагдана.
Солонгосын интернет хэрэглэгчид Пэ Ён-уны эргэн ирэлтэд харилцан адилгүй хандлагатай байна. Зарим нь түүний шинэ төсөлд нь амжилт хүсч байгаагаа илэрхийлж байхад, бусад нь хэргээс хойш "хэтэрхий эрт байна" гэж үзэж, түүний эргэн ирэлтийг эргэлзэж байгаагаа илэрхийлжээ.