BTS-ийн гишүүд Jin болон j-hope соло аялан тоглолтоорээ дэлхийн хит парадуудыг байлдан дагуулж, шинэ амжилтуудыг тогтоолоо
Алдарт "BTS" хамтлагийн гишүүд болох Jin болон j-hope нар саяхан АНУ-ын "Pollstar" сэтгүүлээс гаргасан "Дэлхийн шилдэг 20 аялан тоглолт" болон "Азийн ТОП аялагч уран бүтээлч" жагсаалтад солонгосын уран бүтээлчдээс хамгийн өндөрт бичигджээ.
Jin "#RUNSEOKJIN_EP.TOUR" соло фэн-концертоо зургаадугаар сараас наймдугаар сар хүртэл хийсэн бөгөөд энэ нь "Дэлхийн шилдэг 20 аялан тоглолт" жагсаалтын 14-рт бичигдсэн байна. Түүний Өмнөд Солонгосын Гоян, Японы Чиба, Осака хотод хийсэн тоглолтууд бүгд борлогдож, тэр ч байтугай Осакагийн "Kyocera Dome"-д байсан хамгийн дээд давхар, харагдах орчин хязгаарлагдсан суудал хүртэл бүгд борлогдсон нь солонгосын соло уран бүтээлчдийн хувьд түүхэн амжилт юм. Тэрээр мөн Их Британий "O2 Arena"-д тоглосон анхны солонгос соло уран бүтээлч болж, АНУ-ын Анахайм дахь "Honda Center"-т солонгосын уран бүтээлчдийн түүхэн дэх хамгийн олон үзэгчийг цуглуулж, Даллас дахь "American Airlines Center"-ийн бүх тасалбарыг борлуулсан анхны солонгос соло уран бүтээлч болжээ.
Jin-ийн "Run Jinny" нэртэй өөрийн шоуны ертөнцийг цааш нь өргөтгөсөн энэхүү тоглолт нь "Rolling Stone UK", "NME", "LA Times" зэрэг дэлхийн нэр хүндтэй хэвлэлүүдээс " 김석진-ийн ертөнц, хэзээ ч энгийн зүйл биш", "Гайхамшигтай үзүүлбэр", "Фэнүүдтэй харилцах мастер анги" хэмээн магтагдсан байна.
j-hope "HOPE ON THE STAGE" соло аялан тоглолтоо хоёрдугаар сараас зургаадугаар сар хүртэл хийсэн бөгөөд энэ нь "Азийн ТОП аялагч уран бүтээлч" жагсаалтад (2024.10.01 - 2025.09.30) 5-р байрт оржээ. Энэхүү жагсаалт нь Азид зохион байгуулагдсан тоглолтуудын нийт тасалбарын борлуулалтаар тодорхойлогддог. j-hope Азийн 10 хотод 21 удаагийн тоглолтоо бүгдийг нь борлуулж, нийт 342,000 гаруй үзэгчийг цуглуулснаар өөрийн аялан тоглолтын хүчтэй нөлөөг дахин баталсан. Тэрээр мөн АНУ-ын Лос Анжелес дахь "BMO Stadium"-д тоглосон анхны солонгос соло уран бүтээлчээр бичигджээ.
"HOPE ON THE STAGE" аялан тоглолт нь нэмэлт тоглолтуудыг оруулаад нийт 16 хотод 33 удаагийн тоглолтоор 524,000 гаруй хүнд хүрсэн амжилттайгаар өндөрлөжээ. "Тайзан дахь j-hope" гэсэн утгатай тоглолтын нэр шигээ түүний уран бүтээлийн мөн чанар, түүхийг бүрэн тусгасан гэж үнэлэгдсэн. "Forbes", "NME" зэрэг гадаад хэвлэлүүд "Бүтээлч байдал болон уран бүтээлийн оргилыг харуулсан бүтээл", "Өөрийн авьяас чадвар болон эрч хүчийг дахин баталсан тоглолт", "j-hope-ийн шинэ эрийн эхлэлийг тавьсан аялал" хэмээн магтсан байна.
Үүнээс гадна "BTS" хамтлагийн гишүүд саяхан болсон "2025 Korea Grand Music Awards with iM Bank"-аас шагнал хүртжээ. Jin "Echo" нэртэй хоёр дахь бие даасан цомогт багтсан "Don't Say You Love Me" дуугаараа "Шилдэг хөгжимт видео" шагналыг, j-hope "Шилдэг хип-хоп шагнал", Jimin "Фэнүүдийн дуртай уран бүтээлч", V нар "Оны тренд (K-pop соло төрөл)" шагналыг тус тус хүртсэн юм.
Солонгосын интернет хэрэглэгчид Jin болон j-hope-ийн гаргасан амжилтад маш их баяртай байгаагаа илэрхийлж, тэдний олон улсын нөлөөг дахин харуулсан явдал хэмээн онцолжээ. Тэднийг соло уран бүтээлээрээ өөрсдийн хувийн онцлогийг гайхалтай харуулж байгааг магтаж, цаашдын уран бүтээлийг нь хүлээж буйгаа илэрхийлсэн байна.