2025 MAMA AWARDS: БНХАУ-д болох ёслолд жүжигчин Чоу Юнь-фат, Мишель Йео нар оролцоно
Дэлхийн K-POP урлагийн шилдэг шалгаруулах "2025 MAMA AWARDS" шагнал гардуулах ёслолын нэмэлт уран бүтээлчдийн жагсаалтыг зарлалаа. Энэ удаагийн ёслол арваннэгдүгээр сарын 28, 29-ний өдрүүдэд БНХАУ-ын Хонконг хотын Кайтак цэнгэлдэх хүрээлэнд болно.
"2025 MAMA AWARDS" ёслолд Азийн кино урлагийн түүхэн дэх хамгийн алдартай жүжигчдийн нэг болох Чоу Юнь-фат (Chow Yun-fat) уригдан оролцох болсон нь олны анхаарлыг татаж байна. "Bullet in the Head", "Hard Boiled" зэрэг олон алдартай бүтээлүүдээрээ дэлхий дахинаа танигдсан тэрээр өөрийн хүчирхэг жүжиглэлт, харизмаараа үзэгчдийг байлдан дагуулж ирсэн билээ. Мөн өмнө нь зарлагдсан, Азийн анхны Оскарын эзэн жүжигчин Мишель Йео (Michelle Yeoh) нар энэ удаагийн ёслолын хүндэтгэлийн шагналыг гардуулахаар болжээ.
CJ ENM-ийн төлөөлөгч "Азийн соёлын бэлэг тэмдэг болсон, дэлхий нийтээрээ хайрладаг жүжигчин Чоу Юнь-фат болон Мишель Йео нарын оролцоо нь K-POP болон K-контентын хил хязгаарыг давсан онцгой мөч болно гэдэгт итгэлтэй байна" гэв.
Түүнчлэн, "TOMORROW X TOGETHER" хамтлагийн гишүүн Ёнжун (Yeonjun) "2025 MAMA AWARDS" ёслолд уран бүтээлээ толилуулахаар болжээ. Тэрээр өнгөрсөн жилийн "2024 MAMA AWARDS" ёслолд онцгойрч байсан бол энэ удаа өөрийн анхны соло цомог "Talk to You" болон "Coma" дуунуудаа анх удаа тайзнаа дуулах юм. Түүний соло цомог нь Billboard 200 чартын 10-р байранд бичигдэж, дэлхийн хэмжээнд өөрийн байр сууриа батлан харуулсан билээ. Ёнжун үүнээс гадна Го Юн-джонг, Пак Хён-шик, И До-хён, Им Ши-ван, Жон Ё-бин, Жу Жи-хун зэрэг олон алдартай K-POP болон K-контентын төлөөлөлүүдтэй нэгдэж байгаа юм.
"2025 MAMA AWARDS" ёслол нь арваннэгдүгээр сарын 28-29-ний өдрүүдэд Хонконгийн Кайтак цэнгэлдэх хүрээлэнд болж, Mnet Plus болон бусад дижитал платформуудаар дэлхий даяар шууд дамжуулагдана.
Солонгосын интернэт хэрэглэгчид "Гадаад уран бүтээлчдийн оролцоо маш сэтгэл хөдөлгөм байна!", "Ёнжуны соло тайз, жүжигчин Чоу Юнь-фатыг харахыг тэсэн ядан хүлээж байна!", "Энэ жил 'MAMA' маш сонирхолтой болох нь гарцаагүй" хэмээн сэтгэгдэл үлдээжээ.