DAY6-ийн KSPO DOME-д хийх шинэ жилийн тоглолтын бүх тасалбар дуусчээ!

Өмнөд Солонгосын алдартай хамтлаг DAY6 (데이식스) арванхоёрдугаар сарын 19-21-ний өдрүүдэд KSPO DOME-д болох "2025 DAY6 Special Concert 'The Present'" тоглолтынхоо бүх тасалбарыг борлуулж дуусчээ.

Энэхүү тоглолт нь DAY6 хамтлагийн хувьд KSPO DOME-д хийж буй хоёр дахь томоохон тоглолт юм. Өнгөрсөн тавдугаар сард тэд "DAY6 3RD WORLD TOUR < FOREVER YOUNG > FINALE in SEOUL" тоглолтоо 360 хэмийн тайзтайгаар амжилттай зохион байгуулж байсан билээ. Хамтлагийн шүтэн бишрэгчдэд "My Day" (마이데이) гэдэг бөгөөд арваннэгдүгээр сарын 17-нд болсон фэн клубын гишүүдийн урьдчилсан захиалгаар гурван удаагийн бүх тоглолтын тасалбар ердөө хэдхэн минутын дотор зарагдсан байна.

DAY6 хамтлаг энэ онд байгуулагдсаны 10 жилийн ойгоо тэмдэглэж байгаа бөгөөд бүтэн жил идэвхтэй уран бүтээл туурвисан. Тэд тавдугаар сард "Maybe Tomorrow" дижитал синглээ гаргаж, долоодугаар сард "DAY6 4TH FANMEETING < PIER 10: All My Days >" фэн уулзалтаа зохион байгуулж, наймдугаар сард "DAY6 10th Anniversary Tour < The DECADE >" аялан тоглолтоо эхлүүлж, есдүгээр сард "The DECADE" нэртэй бүрэн хэмжээний цомог гаргасан.

Ийнхүү DAY6 хамтлаг KSPO DOME-д 360 хэмийн өргөн хүрээний тайзтайгаар "The Present" нэртэй тусгай тоглолтоо хийж, фэнүүдтэйгээ хамт 10 жилийн ойгоо тэмдэглэхээр боллоо. Энэхүү тоглолт нь тэдний уран бүтээлийн замнал дахь дахин нэгэн түүхэн үйл явдал болох нь дамжиггүй юм.

Солонгосын интернэт хэрэглэгчид "DAY6 бол сонгодог шүү!", "Тасалбар авч чадаагүйгээсээ харамсаж байна, дараагийн тоглолтоо хурдан зарлаарай!" зэргээр сэтгэгдэл үлдээжээ.