Шүүгч Лий Хан Ён: Жүжигчин Жи Сон MBC сувагтаа 10 жилийн дараа эргэн ирж, шинэхэн триллер драмын зурагт үзэгчдийг алмайрууллаа!
2026 оны нэгдүгээр сарын 2-нд MBC сувгаар үзэгчдэд хүрч эхлэх шинэ "Шүүгч Лий Хан Ён" (판사 이한영) К-драма нь өчигдөр цацагдсан анхны тизер зургаараа олны анхаарлыг татаж эхлээд байна.
"Шүүгч Лий Хан Ён" нь том хуулийн фирмийн боолчлогдсон амьдралаа орхиод, 10 жилийн өмнөх цаг үед эргэн ирж, бугшсан гэмт хэрэгтнүүдийг шинээр сонголт хийх замаар шийтгэн, шударга ёсыг тогтоох тухай өгүүлэх "revenge drama" юм.
Өчигдөр буюу 18-нд дэлгэгдсэн анхны тизер зураг нь тус бүтээлийн агуулга, уур амьсгалыг нэн тод харуулсан бөгөөд үзэгчдийг шууд л татаж чадлаа. Цусанд будагдсан хутгыг хуулийн зузаан номонд гүн шигтгэсэн зураг нь хүчтэй цочрол өгөхөөс гадна, хуулийг зэвсэг болгон шударга ёсыг тогтоохыг эрмэлзэгч Шүүгч Лий Хан Ён-ы хатуу шийдэмгий байдлыг илтгэж байна. "Илдний өмнө зогсох шударга ёс" гэсэн бичиг нь хар дэвсгэр дээр харагдах бөгөөд энэ нь гэм буруутай хүмүүстэй тэмцэгчдийн бат бөх итгэл үнэмшлийг бэлгэдэж, эрх мэдлийн хурц дайралтад хэзээ ч нөлөөлүүлдэггүй шударга ёсны хүчийг илэрхийлсэн хуулийн номын ач холбогдлыг улам бүр тодруулж өгчээ. Анхаарал татсан "Шүүгч Лий Хан Ён"-ы анхны тизер зураг нь амьдралаа дэнчин тавин шударга ёсыг тогтоох шүүгчийн дүрийг бүтээх гэж буйг урьдчилан харуулж, тус бүтээлийн хүлээлтийг өндрөөс өндөрт хүргэж байна.
2026 онд MBC сувгийн шинэ жилийн ажлыг эхлүүлэх "Шүүгч Лий Хан Ён"-д 2015 онд "Kill Me, Heal Me" бүтээлээрээ MBC Кино урлагийн шагнал хүртэж байсан Жи Сон (Ji Sung) 10 жилийн дараа MBC сувагтаа эргэн ирж байгаа нь одоогоор маш их хүлээлт үүсгэж байна. Түүнчлэн өөрийн онцгой жүжиглэлтээр хүчтэй дүрүүдийг бүтээж байсан Пак Хий Сүн (Park Hee-soon), шинэ дүр төрхөө харуулах гэж буй Вон Чин А (Won Jin-ah) болон чадварлаг туслах жүжигчид хамтран ажиллаж буй нь тус бүтээлийн хүлээлтийг бүр ч нэмэгдүүлж байна. Мөн өвөрмөц найруулгын арга барилаараа алдаршсан найруулагч Лий Чже Чин (Lee Jae-jin), Пак Ми Ён (Park Mi-yeon), зохиолч Ким Гванг Мин (Kim Gwang-min) нар хамтран ажиллаж, 2026 оны эхний хагасын хамгийн их хүлээлттэй бүтээл болох "Шүүгч Лий Хан Ён"-ы чанарыг улам бүр өндөрт хүргэх төлөвтэй байна.
"Шүүгч Лий Хан Ён"-ы уран бүтээлчдээс "Тизер зургаараа бид "Илдний өмнө зогсох шударга ёс" гэсэн мессежийг хамгийн үр дүнтэйгээр илэрхийлэх боломжтой зүйлийг сонгож авсан. Шүүгчийг бэлгэдсэн хуулийн ном болон Лий Хан Ён руу чиглэсэн илдний мөргөлдөх мөчийг харуулснаар бид тус бүтээлийн гол утга санаа болон дүрүүдийн итгэл үнэмшлийг дүрсэлсэн. 2026 оны эхний бүтээл болох "Шүүгч Лий Хан Ён"-ы шинэ эхлэлийг та бүхэн их хүлээлттэйгээр хүлээж аваарай" хэмээн тайлбарласан байна.
Солонгосын интернэт хэрэглэгчид "гайхалтай дүрслэл", "драмын сэдвийг төгс илэрхийлсэн" хэмээн тизер зургийг магтаж байна. Жи Сон-ы эргэн ирэлтийг онцолж, "эхний ангиас нь үзнэ" хэмээн амлаж буй шүүмжлэгчид олон байна.