HYBE-ийн уран бүтээлчид "Латин Грэмми"-д амжилт олж, "Грэмми"-д бэлдэж байна: Morat шагнал хүртэж, KATSEYE нэр дэвшлээ

HYBE-тэй хамтран ажилладаг уран бүтээлчид дэлхийн хөгжмийн салбарт хамгийн нэр хүндтэй "Грэмми" (Grammy Awards) шагналд дараалан амжилт олж, өөрсдийн байр сууриа баталгаажуулж байна. HYBE Latin America-аас мэдээлснээр, "Morat" хамтлаг саяхан Лас-Вегас дахь MGM Grand Garden Arena-д болсон 26 дахь удаагийн "Латин Грэмми" шагнал гардуулах ёслолоос тав дахь студийн цомог болох 'Ya Es Mañana (YEM)'-аараа "Шилдэг поп/рок цомог" (Best Pop/Rock Album) шагналыг хүртлээ.

"Morat" нь Хуан Пабло Вилья́мил (Juan Pablo Villamil), Симон Варгас (Simón Vargas), Хуан Пабло Исаза (Juan Pablo Isaza), Мартин Варгас (Martín Vargas) гэсэн дөрвөн гишүүнээс бүрдсэн хамтлаг юм. Тэд сэтгэл хөдөлгөм үг, гэгээлэг, эрч хүчтэй аялгуутай дуугаараа олон шүтэн бишрэгчдийн талархлыг хүлээсэн. Монголын үзэгчид ч "Yoon's Kitchen 2" нэвтрүүлгээр тэдний 'Como Te Atreves' дууг сонссоноор танил болсон.

Тэдний тав дахь студийн цомог 'Ya Es Mañana (YEM)' нь "Morat"-ын өвөрмөц энергитэй арена рок хэв маяг, 2000-аад оны эхэн үеийн мэдрэмжийг агуулсан дуу чимээгээр онцлог юм. 'Ya Es Mañana (YEM)' цомог нь "2025 оны эхний хагасын Billboard-ын сонголтоор шилдэг Латин цомог"-оор шалгарсан бөгөөд 'Me Toca a Mí' дуу нь "Latin Airplay" чартыг тэргүүлсэн (8-р сарын 2-ны байдлаар).

"HYBE Latin America" нь өнгөрсөн долдугаар сард WKE (Walter Kolm Entertainment)-тай хамтран "Morat"-ын менежментийн гэрээг байгуулж, испани хэлээрх хөгжмийн дэлхийн чадавхыг баталгаажуулсан. Түүнчлэн, реггетон супер од "Daddy Yankee" болон Мексикийн алдарт "Meme del Real" нарыг элсүүлэн авч, тус бүс дэх нөлөөллөө бэхжүүлсэн.

"Morat"-ын дараа "HYBE America" болон "Geffen Records"-ын охидын хамтлаг "KATSEYE" (Кэтсай) нар "Грэмми"-д өрсөлдөхөөр бэлдэж байна. "KATSEYE" хамтлаг нь Америкийн "Recording Academy"-гаас 8-р сарын 8-нд зарласан 68 дахь удаагийн "Грэмми" шагналд "Шилдэг шинэ уран бүтээлч" (Best New Artist) болон "Шилдэг поп хамтарсан/хамтлагийн үзүүлбэр" (Best Pop Duo/Group Performance) номинациудад нэр дэвшлээ.

Дэбютээсээ ердөө хоёр жил хүрээгүй байгаа шинэхэн хамтлагийн "Грэмми"-д нэр дэвшсэн нь гайхалтай амжилт юм. Ялангуяа "Шилдэг шинэ уран бүтээлч" нь "Грэмми"-гийн "Big Four"-ийн нэгд тооцогддог гол шагналуудын нэг юм. Энэ нь "K-pop арга зүй"-гээр бүтээгдсэн "KATSEYE"-ийн хурдацтай хөгжлийг харуулсан чухал үзүүлэлт бөгөөд тэдний цаашдын агуу их амжилтыг хүлээхэд хүргэж байна.

ABC News "Грэмми"-гийн гол төрлүүдэд охидын хамтлаг нэр дэвшдэг нь ховор үзэгдэл бөгөөд "Глобал гишүүдтэй охидын хамтлагийн нэр дэвшсэн нь бүр ч ер бусын зүйл" гэж онцолсон бол CNN ""Грэмми" нь "KATSEYE" хамтлаг хамгийн сайн жилийг өнгөрүүлж байгааг баталсан" хэмээн үнэлжээ. 68 дахь удаагийн "Грэмми" шагнал гардуулах ёслол нь 2026 оны 2-р сарын 1-нд (АНУ-ын цагаар) Лос-Анжелес дахь Crypto.com Arena-д болно.

"Morat"-ын "Латин Грэмми"-д хүртсэн ялалт болон "KATSEYE"-ийн амжилт нь HYBE-ийн "Multi-home, multi-genre" (Олон төв, олон төрөл) стратегийн амжилт болон өрсөлдөх чадварыг нэгэн зэрэг харуулсан үр дүн юм. K-pop-ын өвөрмөц бүтээлч системийг дэлхийн янз бүрийн бүс нутагт нэвтрүүлж, тухайн бүсийн соёлын онцлог, зах зээлийн орчныг тусган харьцаж, үйл ажиллагаа явуулснаар орон нутгийн уран бүтээлчдийг шууд татан, хөгжүүлсэн арга нь амжилтад хүрээд байна гэсэн үнэлгээ гарч байна.

Солонгосын интернэт хэрэглэгчид HYBE-ийн уран бүтээлчдийн амжилтад ихэд баярлаж байна. "Энэ бол жинхэнэ дэлхийн байлдан дагуулалт!", "Morat энэ шагналыг авахад лайтай байсан, тэдний дуунууд маш гоё!" хэмээн сэтгэгдэл бичжээ. Мөн KATSEYE-ийн ялалтыг хүлээж буй хүмүүс олон байна: "Тэднийг маш ихээр бахархаж байна, "Грэмми"-гээ авч ирнэ гэж найдаж байна!"