TWICE хамтлагийн гишүүн Чэ Ён эрүүл мэндийн улмаас түр завсарлага авч байна

Алдарт K-pop хамтлаг TWICE-ийн гишүүн Чэ Ён эрүүл мэндийн шалтгаанаар уран бүтээлээ түр хугацаагаар зогсоож байгаагаа мэдэгдэв. Түүнийг вазовагаль синкоп (vasovagal syncope) гэсэн оноштой гэдгийг JYP Entertainment компани 12-р сарын 20-нд албан ёсоор зарлалаа.

Компанийн мэдэгдэлд дурдсанаар, Чэ Ён нь мэргэжлийн эмч нарын зөвлөгөө, нарийвчилсан шинжилгээний үндсэн дээр амралт авч байсан ч, бүрэн эдгэрэхийн тулд нэмэлт хугацаа шаардлагатай гэсэн дүгнэлтэд хүрсэн байна.

"Чэ Ён оны эцэс хүртэл бүрэн амралт, эрүүл мэндийг сэргээхэд анхаарлаа хандуулна. Эрүүл мэндийг нэн тэргүүнд тавих шийдвэр гаргасан тул цаашид төлөвлөгдсөн хуваарьт тэрээр хамгийн бага хэмжээгээр оролцох эсвэл зайлшгүй тохиолдолд оролцохоос татгалзах болно" хэмээн компани онцлов.

Үүнтэй холбогдуулан Чэ Ён Тайвань, Хонконг, Бангкок хотод болох тоглолтуудад оролцох боломжгүй болжээ. Чэ Ён өөрөө энэ талаар маш их харамсаж байгаагаа илэрхийлсэн бөгөөд 10-р сарын сүүлчээр эхэлсэн фэн уулзалт, аялан тоглолтуудад оролцож чадаагүй явдлаа уучлал хүссэн байна.

JYP Entertainment нь шүтэн бишрэгчиддээ санаа зовоосон явдлаасаа чин сэтгэлээсээ уучлал хүсч, Чэ Ён хурдан эдгэрч, эрүүл саруул болж эргэн ирэхэд нь дэмжлэг, урам хайрыг харамгүй өгөхийг хүслээ.

Солонгосын интернэт хэрэглэгчид Чэ Ён-ийн хурдан эдгэрэхийг хүсэн ерөөж, "Эрүүл мэнд нь хамгийн чухал шүү", "Бид чамайг хүлээж байна" гэх зэрэг сэтгэгдлүүдийг үлдээжээ. Түүнчлэн, түүний биеийн байдлыг анхаарч, ажлаа түр зогсоосон нь зөв шийдвэр байсныг онцолжээ.