NewJeans хамтлагийн гишүүдийн зургаар порно хийсэн этгээдэд торгууль ногдуулжээ
Өмнөд Солонгосын алдартай "NewJeans" хамтлагийн гишүүдийн царайг ашиглан порнограф контент бүтээж, тараасан 20 гаруй настай эрэгтэйд шүүхээс торгуулийн арга хэмжээ авчээ.
"NewJeans" хамтлагийн гишүүд болох Харин, Хани, Мин Жи нарын царайг хуурамч видео, зураг бүтээхэд ашигласан хэрэгт холбогдсон "А" гэгдэх залууг шүүхээс 15 сая воны торгуульд унагаж, мөн бэлгийн хүчирхийллийн чиглэлээр 40 цагийн эмчилгээнд хамрагдахыг үүрэгджээ.
Тус хэргийн шүүх хуралдааны үеэр, "А" нь өөрийн гэртээ байхдаа "NewJeans" хамтлагийн гишүүдийн царайг ашиглан зохиомол видео, зургийг бэлтгэж, улмаар түүнийг Телеграм сувгаар дамжуулан 200 орчим хүнд тараасан болох нь тогтоогджээ.
Шүүхээс "Яллагдагчийг гэм буруутайд тооцохдоо, тархац ихтэй Телеграм сувгаар хуурамч видео материалыг тараасан, хохирогчдоос уучлалт гуйгаагүй зэргийг харгалзсан" хэмээн шийтгэлийн үндэслэлийг тайлбарласан байна.
"NewJeans" хамтлагийг удирддаг ADOR компани өмнө нь мэдэгдэл хийхдээ, "Манай компани "NewJeans" хамтлагийн гишүүдийн эрхийг хамгаалахын тулд дотоод болон гадаад онлайн нийгэмлэг, хөгжмийн платформ, SNS сувгуудыг байнга хянаж, уран бүтээлчдийн эрхийг зөрчсөн аливаа нийтлэлийг шуурхай устгах, хуулийн арга хэмжээ авахад бэлэн байдаг. Гадаад улсад байрлах сайтуудын хувьд ч ялгаварлах зүйлгүй хатуу арга хэмжээ авна" гэж байсан юм.
Мөн "Deepfake" гэмт хэрэгтэй тэмцэхэд онцгой анхаарал хандуулж, "Саяхан "deepfake" үйлдвэгчдээс гэрээ байгуулах санал ирсэн боловч бид үүнийг татгалзаж, хатуу арга хэмжээ авахаар мөрдөн байцаах байгууллагад мэдэгдсэн. Түүнчлэн, "deepfake" гэмт хэргийг устгахын тулд уран бүтээлчдийн төлөө мөрдөн байцаах байгууллагатай идэвхтэй хамтран ажиллаж байна" хэмээн онцолж байв.
Солонгосын интернэт хэрэглэгчид энэ хэргийг маш ихээр шүүмжилж, гэмт этгээдийг илүү хатуу шийтгэхийг шаарджээ. Олон хүн уг торгууль нь уран бүтээлчдэд учруулсан хохирлыг барагдуулахад хангалтгүй гэж үзэж, цаазаар авах ял өгөх ёстой хэмээн үзэж байв.