Ю Сон-жуний шинэ цомогт гарч ирэв

Цэргийн албанаас зайлсхийсэн хэргээр Өмнөд Солонгост нэвтрэх эрхгүй болсон дуучин Ю Сон-жун (Стив Ю) рэппер Жастисын шинэ цомогт багтжээ.

Ю Сон-жун энэ сарын 20-нд гарсан Жастисын шинэ цомог 'LIT'-ийн 'HOME HOME' дуунд хамтран дуулсан байна.

Жастис шинэ цомог гарсныг тэмдэглэж, 20-нд өөрийн YouTube сувгаараа бичлэг болон бүтээлийн явцын талаарх видеог нийтэлжээ. Тус видеонд Жастис Ю Сон-жунтай уулзаж, ярилцсаны үндсэн дээр хамтдаа дуу бүтээсэн байна.

Жастисын шинэ цомогт Бумки, Ин Суни, Ради, Иллинит, Дин зэрэг өөр өөр урсгалаар уран бүтээл туурвидаг олон уран бүтээлч оролцсон. Харин бусад дуучид цомогт нэр бүхий дуучин гэж албан ёсоор бүртгэгдсэнээс ялгаатай нь Ю Сон-жуны нэр дурдагдаагүй байна.

Сануулахад, Ю Сон-жун 2002 оны нэгдүгээр сард цэргийн албанд татагдахын өмнө гадаад тоглолтын шалтагаар эх орноосоо гараад гэнэт Америкийн иргэншил авч, цэргийн албанаас зайлсхийсэн хэргээр шуугиан тарьсан билээ.

Солонгосын нетизэнчүүд Ю Сон-жуны шинэ дуунд гарч ирсэнд ихэд гайхаж, мөн бухимдалтай ханджээ. Тэд үүнийг хууль болон нийгмийн хэм хэмжээг үл хүндэтгэсэн хэрэг хэмээн үзэж байна. Зарим нь ийм маргаантай нэр хүндтэй уран бүтээлчтэй хамтарсан Жастисыг буруутгаж, сэтгэл дундуур байдлаа илэрхийлжээ.