IVE хамтлагийн гишүүн Ли Со 'Inkigayo' нэвтрүүлгээс явж байна
K-pop ертөнцийг шуугиулж буй IVE хамтлагийн гишүүн Ли Со (Lee Seo) "SBS Inkigayo" нэвтрүүлгийн хөтлөгчийн үүргээсээ бууж буйгаа зарлалаа.
Ли Со өнгөрсөн оны дөрөвдүгээр сард "Inkigayo" нэвтрүүлэгт хөтлөгчөөр элссэн бөгөөд тэр цагаас хойш өөрийн гэсэн эрч хүчтэй, хэрнээ цоглог хөтлөлтөөрөө үзэгчдийн хайрыг хэдийнээ татсан юм. Тэрээр тогтмол сайжирч, найдвартай хөтлөлтөөрөө тус нэвтрүүлэгт шинэ өнгө төрхийг авчирч, "Inkigayo"-гийн нүүр царай болж чадсан билээ.
Өнгөрсөн хугацаанд үзэгчдэд өөрийн гэсэн гэрэлт энергиэ түгээж байсан Ли Со энэ оны төгсгөлд "Inkigayo" хөтлөгчөөсөө буух юм. Түүний цаашдын ажлын хуваарь их завгүй байгаа тул ийнхүү харамсалтайгаар баяртай гэж хэлэхэд хүрсэн байна. Энэ долоо хоногт болох нэвтрүүлгээрээ тэрээр сүүлчийн удаа үзэгчдэдээ хандаж, 1 жилийн 7 сарын турш үргэлжилсэн хөтлөгчийн замналаа өндөрлүүлэхээр төлөвлөжээ.
"Inkigayo" нэвтрүүлгийн найруулагч Чхве Жан-вон (Choi Jang-won) ""Inkigayo" хамтлагийн маань хайртай гишүүн Ли Со-гоо үдэж байгаадаа маш их харамсаж байна. Түүний байнга цацруулдаг гэрэлт энерги нь бидэнд, тэр ч бүү хэл шууд нэвтрүүлэг хийх үед ч их урам зориг өгдөг байсан. "Inkigayo" болон продакшны хамт олондоо их хэмжээний хайр, хичээл зүтгэл гаргасан Ли Со хөтлөгчдөө чин сэтгэлээсээ талархаж байна" хэмээн талархлаа илэрхийлэв. Тэрээр нэмж хэлэхдээ, "Ли Со-гийн 10 гаруй насны төгсгөлийг "Inkigayo"-гийн хамт өнгөрүүлсэн нь бидний хувьд нэр төрийн хэрэг байсан бөгөөд цаашдаа улам бүр гэрэлтүүлэх түүний цаашдын замналыг ерөөж байна. Дараа нь бид сайхан газарт дахин уулзаж, хамт ажиллахыг хүсэж байна" гэв.
"Inkigayo" нэвтрүүлгийнхээ сүүлчийн дугаартаа орох гэж буй Ли Со "1 жил 7 сарын турш долоо хоног бүрийн Ням гарагийг DIVE (албан ёсны фэн клубын нэр), мөн "Inkigayo"-гийн үзэгчдийн хамт өнгөрүүлсэн нь үнэхээр нэр төрийн хэрэг байлаа. "Надад бол долоо хоног бүрийн Ням гараг нь бэлэг шиг л байсан. Анх удаагаа хийж байгаа учраас алдаатай байсан ч байж магадгүй, гэсэн ч байнга дэмжиж, их хайрыг харамгүй хайрснаараа үзэгчид надад аз жаргалтайгаар дуусгахад тусалсан" хэмээн чин сэтгэлээсээ хуваалцлаа.
Тэрээр "Үргэлж MC Ли Со-г дэмждэг DIVE-даа би маш их хайртай, мөн энэ хугацаанд хамт зүтгэсэн продакшны хамт олон, компанийн ажилтан болон бусад хөтлөгчиддөө талархлаа илэрхийлж байна. MC Ли Со-гийн дүр төрх түр хугацаанд өндөрлөж байгаа ч, IVE хамтлагийн Ли Со-гийн хувьд бүр ч илүү гайхалтай тайз, уран бүтээлээрээ үзэгчдэдээ хүрэх болно. Тиймээс цааш нь ч их дэмжлэг үзүүлнэ гэдэгт итгэж байна" хэмээн нэмж хэлэв.
MC Ли Со-гийн сүүлчийн мэдэгдлийг 12-р сарын 7-ны Ням гарагийн 15:20 цагт гарах "SBS Inkigayo" нэвтрүүлгээр үзэх боломжтой.
Солонгосын интернэт хэрэглэгчид Ли Со-гийн явдалд харамсалтай хандаж байна. "Явах нь харамсалтай ч IVE-ийн хуваарь маш завгүй гэдгийг би ойлгож байна", "Тэр маш сайн хөтлөгч байсан, түүний цаашдын амьдралд нь амжилт хүсье!" болон "IVE-ийн бүрэлдэхүүнд эргэн ирэхийг нь тэсэн ядан хүлээж байна!" гэх зэрэг сэтгэгдлүүдийг бичжээ.