NHK:aespa хамтлагийн Ниннин "Улаан, Цагаан" наадамд оролцоход "асуудалгүй"
Японы үндэсний нийтийн телевиз NHK нь "Улаан, Цагаан" (Kohaku Uta Gassen) хөгжмийн наадамд "aespa" хамтлагийн гишүүн Ниннингийн оролцох эсэх талаар албан ёсны байр сууриа илэрхийллээ.
Өнгөрсөн хоёрны өдөр болсон Японы парламентын Зөвлөлийн Нийтийн харилцааны хорооны хуралдаан дээр NHK-ийн Дэд ерөнхийлөгч Ямана Хироо Ниннингийн оролцоотой холбоотой асуултад "асуудалгүй" гэж хариулсан байна.
Тус хорооны хуралдааны үеэр Японы Инновацийн Намын гишүүн Ишии Мицүко Ниннингийн оролцооны талаар асуухад, Ямана Хироо "Бид тухайн гишүүнийг цөмийн бөмбөгийн хохирлыг үл ойшоосон, эсвэл дооглон тохуурхсан ямар ч санаагүй байсныг агентлагаас нь шалгаж баталгаажуулсан" хэмээн мэдэгджээ.
Тэрээр мөн "Оролцох уран бүтээлчдийг сонгохдоо тухайн жил хийсэн бүтээл, олон нийтийн дэмжлэг, хөтөлбөрийн зохиомж, найруулгад хэр нийцэж байгаа зэрэг шалгууруудыг үндэслэн NHK бие даан шийдвэр гаргадаг" гэж нэмж хэлсэн байна.
Сануулахад, Ниннин нь 2022 онд цахим сүлжээндээ "Гал тогооны хөөрхөлтэй гэрэл худалдаж авлаа" хэмээн цөмийн бөмбөгийн "мөөгөн үүл"-ийг санагдуулам гэрэл зураг нийтэлж байсан нь маргаан дагуулж байв. Үүний улмаас Японы зарим иргэд Ниннингийн өмнөх постоо дурдаж, Хирошимагийн цөмийн бөмбөгийн хохирогчдод шарх учруулж болзошгүй хэмээн үзэж, "Улаан, Цагаан" наадамд оролцохыг нь эсэргүүцэж байсан юм.
Энэхүү үйл явдал нь Хятад, Японы хоорондын улс төрийн хурцадмал байдал оргилдоо хүрээд байгаа цаг үед болж байна. Японы Ерөнхий сайд Такаичи Санаэгийн "Тайваньд хямрал үүссэн тохиолдолд оролцоно" гэсэн мэдэгдэл нь хоёр улсын харилцааг улам хурцатгаж, улс төрээс гадна урлаг, соёлын салбарт ч нөлөөлөх болсон. Өмнө нь "One Piece" анимэйшны дууг дуулсан Японы дуучин Оцуки Маки нь энэ сарын 28-нд Шанхайд болсон "Bandai Namco Festival 2025" арга хэмжээний үеэр тайзнаас хөөгдсөн. Мөн дуучин Хамасаки Аюми нь энэ сарын 29-нд Хятадын талын тоглолт цуцлагдсан тухай мэдэгдлийн дараа үзэгчгүйгээр тоглолтоо хийхээр болсон юм.
Японы интернет хэрэглэгчдийн дунд янз бүрийн санал бодол байна. Зарим нь NHK-ийн шийдвэрийг дэмжиж, уран бүтээлчдийг улс төр, урлагаа хуваах ёсгүй гэж үзэж байгаа бол зарим нь өмнөх явдлуудыг иш татан, сэтгэл ханамжгүй байдлаа илэрхийлсээр байна. Ерөнхийдөө санал хуваагдмал байгаа ч олон хүн болгоомжтой хандахыг уриалж байна.