Алдарт хөтлөгч Кан Хо-дон 12 жилийн дараа дан ток шоунд эргэн ирж байна!
30 гаруй жил "Үндэсний MC" хэмээх алдрыг зүтгэж яваа Кан Хо-дон 12 жилийн дараа дан шоугаа хөтлөхөөр болжээ. Энэ тухай 12-нд OSEN мэдээллээ.
Кан Хо-дон саяхан Coupang Play-тай хамтран шинэ ток шоу нэвтрүүлэг бэлтгэж эхэлсэн нь батлагджээ. Тэрээр ток шоу хөтлөхөөр үзэгчдийн өмнө гарах нь 12 жилийн дараах үйл явдал юм. Урьд нь жүдоч байсан Кан Хо-дон 1993 онд MBC телевизийн комик болж, дараа нь "Cheonsaeng Yeonbun", "X-Man", "Golden Fishery", "Knee Drop Guru", "Star King", "Strong Heart" зэрэг олон нэвтрүүлгээрээ үзэгчдийн талархлыг хүлээж байсан билээ.
"2 Days & 1 Night" нэвтрүүлгийн хамгийн оргил үед нь хөтлөн "Үндэсний MC" болсон тэрбээр хөтлөгчдийн дундаас анх удаа "Baeksang Arts Awards"-ын телевизийн шилдэг шагналыг хүртэж, мөн гурван телевизийн шагналаас "Triple Crown"-г авсан түүхтэй. 2000-аад онд тэрээр Ю Же-соктой эн зэрэгцэхүйц алдартай байж, "Ю-Кан" гэх нэр авч байжээ.
Одоо ч гэсэн "New Journey to the West" цуврал, "Knowing Bros", "Shiksin Road", "Kang's Kitchen", "Great Escape" зэрэг нэвтрүүлгүүдээрээ амжилттай явж байгаа Кан Хо-дон 12 жилийн дараа дан ток шоунд эргэн ирж байгаа нь олон үзэгчдийн анхаарлыг татаж байна.
Кан Хо-дон, Coupang Play нар хамтран бэлтгэж буй энэ нэвтрүүлэг нь нэг нэгийгээрээ ярилцдаг ток шоу хэлбэртэй байх юм байна. Нэвтрүүлгийн тодорхой чиглэл, концепц зэрэг нь одоогоор яригдаж байгаа бөгөөд нэр нь ч хараахан гараагүй байна. Эхний дугаарт урих зочин алдартнуудыг ч сонгож эхэлсэн гэсэн мэдээлэл байна. "Knee Drop Guru" нэвтрүүлгээрээ чадварлаг ток шоу хөтлөх чадвараа харуулж байсан Кан Хо-доны шинэ нэвтрүүлэгтээ хэрхэн хошин ур чадвараа гаргаж, зочидтой хэрхэн харилцах нь ихээхэн хүлээлт үүсгэж байна.
Одоогоор Кан Хо-дон JTBC телевизийн "Knowing Bros" нэвтрүүлэгт 10 дахь жилдээ тогтмол оролцож, үзэгчидтэйгээ уулзаж байна.
Кан Хо-донгийн эргэн ирэлтэд Корейн интернэт хэрэглэгчид ихээхэн баярлаж байгаагаа илэрхийлжээ. "Эцэст нь! Бид энэ мөчийг маш их хүлээсэн!", "Заавал үзнэ ээ, түүний энерги үнэхээр онцгой шүү!", "Эхний зочин хэн бол болдоо?" гэх зэрэг сэтгэгдлүүдийг бичжээ.