Jvcki Wai-н хуучин найз, продюсер Vangdale-ийг хүчирхийллийн хэргээр буруутгалаа
А-СОМG-ын уран бүтээлч, дуучин Jvcki Wai (Ким Да-ву) нь хуучин найз залуу, хөгжмийн продюсер Vangdale (Пан Даль)-ийг гэр бүлийн хүчирхийлэл үйлдсэн гэх мэдэгдлийг хийсэн байна. Тус агентлагаас мэдээллийг шалгаж байгаагаа мэдэгджээ.
Jvcki Wai өнгөрсөн арван хоёрны өдөр өөрийн цахим хуудсаараа дамжуулан хуучин найз залуугаасаа болж нүүр болон биеийнхээ хэсэгт хөхрөлт үүссэн зургуудыг нийтэлж, олныг цочирдуулсан юм. Тэрээр "Би хоёр долоо хоногийн турш гадагшаа гарч чадаагүй. Гэртээ ирж, хаалга тогшоод, нууц үгийг нь хийгээд орох гэж байсан тэр үед надад зодуулж, гэртээ байх ч эрхгүй болсон. Цахим хуудсандаа тавьсан чинь тэр надад огт холбогдохгүй байна" хэмээн бичжээ. Тэрээр аюулгүй байдлаа хангахын тулд энэ талаар ил болгохоос өөр аргагүй байсан гэдгээ онцолсон.
Үүссэн нөхцөл байдалтай холбогдуулан Vangdale нь цахим хуудсаараа дамжуулан "Би зүгээр л түүнийг тайвшруулах гэж оролдсон, үймээнээс болж өөрт нь гэмтэл учруулсан зургаа аваад хүнийг муухай харагдуулах гэж оролдсон" хэмээн тайлбарлаж, хэргийг үгүйсгэсэн байна. Харин Jvcki Wai нь "Би чамайг зодсон үнэн. Гэхдээ би 99 хувь нь зодуулж, чамайг харааж зүхүүлсэн байхад чи яагаад зөвхөн өөрт тохиолдсон зүйлээ л хэлээд намайг унагагах гээд байгаа юм бэ" хэмээн дахин мэдэгдэл хийжээ.
Түүнчлэн, Jvcki Wai нь Vangdale өмнө нь түүнийг сүхээр заналхийлж, барьцаалж байсан хэмээн мэдэгдээд, түүний агентлагаас нь уучлалт гуйсан ч сэтгэл нь зөөлрөөд буцаад уулзсандаа харамсаж байгаагаа илэрхийлсэн байна. Jvcki Wai нь 2016 онд анхны EP 'EXPOSURE'-оо гаргаж, албан ёсоор дебют хийсэн бөгөөд одоогоор AOMG-ын уран бүтээлчээр уран бүтээлээ туурвиж байна. Vangdale нь продюсерээр ажиллаж байсан ба дуучин Jvcki Wai-тай хамтран 'MALLAK' цомог болон 'Spoil U' синглийг гаргаж байжээ.
Солонгосын интернет хэрэглэгчид Jvcki Wai-г дэмжиж, Vangdale-ийн үйлдлийг хатуу шүүмжилж байна. "Энэ үнэхээр аймшигтай байна, түүнийг аюулгүй байгаасай" гэх мэт сэтгэгдлүүд ихээр бичигджээ. "Тэр өөрийгөө хохирогч мэт харагдуулах гэж оролдсон ч бүгд үнэнийг харж байна" гэж нэгэн хэрэглэгч бичсэн байна.