Холливудын алдарт найруулагч Роб Райнер болон түүний эхнэр нас барсан нь гэр бүлийн маргаантай холбоотой байж болзошгүй нөхцөл байдлыг илтгэж байна

Холливудын нэрт найруулагч Роб Райнер болон түүний эхнэр Мишель Райнер нар нас барсан нь гүн цочирдсон мэдээллийг дэлхий нийтэд түгээж байна. Гадаад хэвлэлүүдийн мэдээлснээр, нас барахаасаа өмнө Райнер гэр бүлийнхэн нэгэн үдэшлэгт оролцсон бөгөөд тэнд тэдний хүү Ник Райнер болон найруулагч Роб Райнер, эхнэр Мишель Райнер нарын хооронд ширүүн маргаан болсон гэх мэдээлэл гарчээ.

Маргааш өдөр нь, массажны эмчилгээ хийлгэх байсан найруулагч Райнер хаалгаа нээгээгүй тул тэдний охин Роми Райнер гэр рүү нь орж, харамсалтай нь эцэг эх хоёрыг нь нас барсан байдалтай олсон байна.

Цагдаагийн байгууллагаас энэ хэргийг аллага байж болзошгүй хэмээн үзэж шалгаж байгаа бөгөөд гэр бүлийн дотоод асуудалтай холбоотой мэдээлэл гарч байна. Тухайлбал, тэдний хүү Ник Райнер нь хар тамхинд донтох болон сэтгэцийн эрүүл мэндийн асуудлуудтай удаан хугацаанд тэмцэж байсан тухай өмнө нь ил тод ярьж байсан нь анхаарал татаж байна.

Үдшлэг дээр хүү Ник Райнер нь маш тогтворгүй зан авир гаргаж, бусад зочдыг цочирдуулж байсан тухай нэгэн эх сурвалж ярьжээ. Энэ явдлын дараа Роб Райнер, Мишель Райнер нар үдэшлэгээс эртлэн гарсан байна. Үүний дараахан буюу ням гарагийн үдээс хойш тэд Лос Анжелес дэх гэртээ нас барсан байдалтай олдсон юм.

Ник Райнерыг баривчилж, аллагын хэргээр буруутган хорьсон боловч, цагдаагийн байгууллагаас хэргийн болон үйлдсэн хэргийн талаарх дэлгэрэнгүй мэдээллийг одоогоор албан ёсоор баталгаажуулаагүй байна.

Роб Райнер нь "When Harry Met Sally", "Misery", "Stand by Me" зэрэг олон алдартай бүтээл туурвисан Холливудын нэртэй найруулагч юм. Түүний гэнэтийн нас баралтын мэдээ нь уран бүтээлчид, найз нөхөд, албаны хүмүүсийн дунд эмгэнэл дагуулж байна.

Интернэт хэрэглэгчид "Аймаар эмгэнэлтэй явдал", "Үлгэр домог шиг харамсалтай хэрэг" хэмээн сэтгэлээ илэрхийлж байна. Зарим нь хэргийн бүх учрыг түргэн шуурхай олж тогтооно гэдэгт найдаж, гэр бүлд нь энэ хүнд хэцүү цагийг давж туулах хүч чадал олдоно хэмээн хүсэж байна.