Лий Ий-гён-ийн агентлаг Ю Дэ-сокийн тухай цуу яриаг няцаалаа

Жүжигчин Лий Ий-гён-ийн "How Do You Play?" (놀면 뭐하니?) нэвтрүүлгээс гарах явдалтай холбоотой Ю Дэ-сокийн талаарх гүтгэлгийг түүний "Sangyeong ENT" агентлаг няцаалаа.

"Манай жүжигчин Лий Ий-гён-ийн "How Do You Play?" нэвтрүүлгээс гарахтай холбогдуулан зарим хэвлэлд гарч буй худал таамаглал, цуу яриаг залруулах зорилгоор энэ мэдэгдлийг хийж байна" хэмээн агентлагаас 16-нд мэдэгдэв.

"Бид "How Do You Play?"-ийн продакшны багаас халах тухай мэдэгдлийг авсан. Тухайн үед продакшны баг "Дээд газраас шийдвэрлэсэн асуудал, өөрчлөлт байхгүй" гэж хэлсэн" хэмээн "Sangyeong ENT"-ийн төлөөлөгчид тайлбарлав. "Бид энэ шийдвэрт харамсалаа илэрхийлсэн боловч энэ нь Ю Дэ-сокийн санал байсан эсэхийг огт асууж, лавлаж байгаагүй гэдгийг тодотгож байна".

Агентлагаас мөн халах тухай мэдэгдэл ирсэн өдөр Лий Ий-гён Ю Дэ-соктэй утсаар ярьж, харамсалаа илэрхийлсэн хэмээн онцолжээ. "Утсаар ярихдаа "Дараа уулзаад ярилцъя" хэмээн дэмжсэн яриагаар дууссан. Үүнээс хойш Лий Ий-гён Ю Дэ-сокийн талаар огт дурдаагүй" хэмээн тэд онцлов.

Тэд батлагдаагүй таамаглал, гүтгэлэг тараахаас зайлсхийхийг уриалжээ.

Сануулахад, 2022 оны есдүгээр сард "How Do You Play?"-д элссэн Лий Ий-гён гурван жилийн дараа тус шоуг орхиж байна. Анх түүний гарах шалтгаан нь хувийн асуудлаас үүдэлтэй гэгдэж байсан ч, саяхан жүжигчний хувийн амьдралын тухай гарсан цуу ярианы талаарх мэдэгдэл шинээр хэлэлцүүлгийг өдөөв. Түүнчлэн, саяхан болсон шагналын үеэр Лий Ий-гён "How Do You Play?"-ийн гишүүдээс Ю Дэ-сокийг эс тооцсон нь түүнийг "захиалсан" гэх хардлагыг дагуулж, маргаан дэгдээв.

Солонгосын интернэт хэрэглэгчид энэ мэдээг эрчимтэй хэлэлцэж байна. Олон хүн Лий Ий-гён болон түүний агентлагийг дэмжиж, цуу яриа тараахаа болихыг уриалжээ. "Агентлаг нь нөхцөл байдлыг тодруулсанд баяртай байна!" гэж нэгэн хэрэглэгч бичсэн бол нөгөө нь "Эцэст нь үнэн гарлаа!" гэж нэмжээ.