TXT-ийн цомог Oricon-ы жилийн шилдэгт гурвуулаа багтлаа!
Өмнөд Солонгосын "Tomorrow X Together" (TXT) хамтлаг Японы Oricon чартын жилийн шилдэг жагсаалтад гурван ч цомогтойгоо багтаж, тус улсад үзүүлж буй нөлөөгөө харууллаа.
12-р сарын 17-нд Oricon-оос зарласан "Жилийн шилдэг 2025" (2024 оны 12-р сарын 23 – 2025 оны 12-р сарын 15) тайлангаас үзвэл, "Tomorrow X Together" хамтлагийн энэ онд гаргасан дөрөв дэх студийн цомог "The Star Chapter: TOGETHER", мөн Японд гаргасан гурав дахь студийн цомог "Starkissed" нар "Жилийн шилдэг цомог" жагсаалтын 9 болон 17-р байрт тус тус шалгарчээ.
Өнгөрсөн арван нэгдүгээр сард гарсан "The Star Chapter: SANCTUARY" мини цомог нь 64-р байрт орж, тэдний тогтмол нэр хүндтэй байдгийг онцлон харууллаа. Харин "The Star Chapter: TOGETHER" цомог нь "Жилийн нийт цомгийн борлуулалт" жагсаалтад 461,622 оноогоор 9-р байрт бичигджээ.
TXT энэ онд Oricon чартуудад түүхэн амжилт үзүүллээ. 10-р сард гарсан "Starkissed" цомог нь тус хамтлагийн хамгийн өндөр оноо авч, "Долоо хоногийн нийт цомгийн борлуулалт" болон "Долоо хоногийн цомгийн борлуулалт" чартуудыг тэргүүлсэн байна. Мөн 7-р сард гарсан "The Star Chapter: TOGETHER" цомог ч энэхүү хоёр чартыг тэргүүлж, хийсэн бүтээл бүрээ амжилттайгаар гаргаж ирсэн юм.
Тэдний нэр хүнд Billboard Japan-ын 2025 оны жилийн тайланд ч тод харагдлаа. "The Star Chapter: TOGETHER" (12-р байр), "Starkissed" (17-р байр), "The Star Chapter: SANCTUARY" (58-р байр) зэрэг гурван цомог нь "Top Album Sales" чартад багтжээ.
"Tomorrow X Together" хамтлаг "TOMORROW X TOGETHER WORLD TOUR 'ACT : TOMORROW'" дэлхийн аялан тоглолтынхоо хүрээнд Японы таван том куполт ордонд тоглолт хийж байна. Сайтама, Айчи дахь тоглолтууд амжилттай болж өндөрлөсөн бөгөөд 12-р сарын 27-28-нд Фукуока, 2026 оны 1-р сарын 21-22-нд Токио, 2-р сарын 7-8-нд Осака хотуудад тоглолтоо хийх юм.
Мөн тэд Японы жилийн төгсгөлийн тайзнуудад ч өөрсдийн байр сууриа бэхжүүлж байна. Саяхан Fuji TV-гийн "2025 FNS Music Festival", TBS-ийн "CDTV Live! Live! Christmas Special" зэрэг томоохон шоунд үзүүлсэн гайхалтай тоглолтууд нь "Жилийн төгсгөлийн TXT"-ийн чанрыг дахин харууллаа. Түүнчлэн 12-р сарын 30-нд Японы хамгийн том жилийн баяр "Countdown Japan 25/26"-д оролцох ажээ.
Японы интернэт хэрэглэгчид TXT-ийн амжилтад ихэд баярлаж, "TXT-ийн гурван цомог Oricon-ы жилийн шилдэгт багтсан нь үнэхээр гайхалтай байна!", "Тэдний Японд нэр хүнд нь жил ирэх тусам өсч байгаа нь батлагдлаа!" гэж сэтгэгдэл үлдээжээ.