1.65 сая дагагчтай YouTube-ийн од Шан Хэ-ги согтуугаар тээврийн хэрэгсэл жолоодож, цагдаагийн шалгалтыг эсэргүүцсэн хэргээр шалгагдаж байна

1.65 сая гаруй дагагчтай алдартай YouTube од Шан Хэ-ги (Shang Hae-gi) зам тээврийн хөдөлгөөний хуулийг зөрчиж, согтуугаар тээврийн хэрэгсэл жолоодож, улмаар цагдаагийн алба хаагчдын шалгалтыг эсэргүүцсэн хэргээр хэвлэл мэдээлэл болон олон нийтийн сүлжээнд ихээхэн шуугиан тарьж байна.

Мягмар гарагийн өглөө Шан Хэ-гитэй холбоотой мэдээлэл цахим орчинд түгж, түүний YouTube болон олон нийтийн сүлжээний хуудаснуудад хэрэглэгчдийн сэтгэгдэл, хандалт ихэссэн байна.

Үүний өмнө, Сөүл хотын Сонгпа дүүргийн цагдаагийн газраас 30 орчим насны нэгэн эр согтуугаар тээврийн хэрэгсэл жолоодож, цагдаагийн согтуурлын шалгалтыг эсэргүүцсэн хэргээр баривчилсан тухайгаа мэдэгджээ.

Тухайн этгээд нь өнгөрсөн ням гаригийн шөнийн 3:50 цагийн орчимд Сөүл хотын Гангнам дүүргээс Сонгпа дүүрэг хүртэл согтуугаар тээврийн хэрэгсэл жолоодсон хэмээх хардлагад холбогдоод байгаа юм.

Согтуугаар тээврийн хэрэгсэл жолоодсон тухай мэдээлэл авсны дараа, цагдаагийн байцаагчид шалгалт хийхээр очиход тухайн этгээд шалгалтыг эсэргүүцэн зугтаасан байна.

Зам дээр автомашинаа орхиж, ойролцоогоор 300 метрийн зайд зугтаасан этгээд нь цагдаагийн хэд хэдэн удаагийн шаардлагыг үл хайхран, согтуурлын шалгалтыг өгөхөөс татгалзсан тухай мэдээлэгджээ.

Сүлжээний хэрэглэгчид энэ нь 1.65 сая дагагчтай 30 орчим насны YouTube од Шан Хэ-ги байж болзошгүй хэмээн таамаглаж байна.

Үнэн хэрэгтээ, Шан Хэ-гийн олон нийтийн сүлжээний хуудсуудад "Согтуугаар жолоодож явсан уу?", "Буруу хийгээд яагаад зугтаав?", "Баяртай" гэх мэт сэтгэгдлүүд бичигдсээр байна.

Одоогоор цагдаагийн байгуллага тухайн этгээдээс хэргийн бодит нөхцөл байдлыг тодруулахаар шалгаж ажиллаж байна.

Шан Хэ-ги "Survival Fashion" нэртэй өвөрмөц контентоор олонд танигдсан. Түүний контент нь үнэтэй эд зүйлсийг зориуд гэмтээж, өвөрмөц байдлаар ашигладаг онцлогтой. Тэрээр өөрийн хувийн амьдралын талаарх мэдээлэлээ олон нийтийн сүлжээгээр байнга хуваалцдаг.