WJSN-ийн Да Ён "body" дуугаараа анхны бие даасан ялалтаа байгууллаа!
Алдарт "WJSN" хамтлагийн гишүүн Да Ён "body" нэртэй шинэхэн уран бүтээлээрээ анхны бие даасан уран бүтээлийн ялалтаа амжилттай тэмдэглэлээ.
9-р сарын 23-нд болсон SBS funE телевизийн "The Show" нэвтрүүлгийн үеэр Да Ён "body" дуугаараа "The Show Choice" шагналд хүртэж, бие даасан уран бүтээлээ эхлүүлснээс хойш анхны шагналаа гардан авлаа.
"body" дууг минь хайрлаж буй олон хүмүүстэй учрах болсондоо өдөр хоногийг мөрөөдөл шиг өнгөрүүлж байна. "The Show Choice" шагнал авах нь маш их баяр хөөртэй, сэтгэл хөдөлгөм зүйл боллоо. Бие даасан уран бүтээлч болоход минь чин сэтгэлээсээ тусалсан бүх хүмүүс, "WJSN" хамтлагийн гишүүд, мөн хамгийн чухал нь үнэнчээр хүлээсэн "Ujung" (албан ёсны фэн клубын нэр) хэмээх шүтэн бишрэгчиддээ баярлалаа, хайртай гэдгээ хэлмээр байна. Энэхүү цомыг авч чадсан нь та нарын ач юм" хэмээн Да Ён өөрийн харьяа "Starship Entertainment"-аар дамжуулан сэтгэгдлээ хуваалцжээ.
"Миний түүх, чин сэтгэлийн дууг бүтээхийн тулд их бодож, өнгөрсөн 9 жилийг эргэцүүлсэн. Энэ явцад би тайзан дээр өөртөө итгэх итгэлийг олж авсан шигээ, миний дууг сонсож буй хүмүүс ч итгэл, зоригтой болоосой хэмээн найдаж байна. "Да Ён" гэсэн нэрээрээ харуулах зүйл надад маш их байгаа тул, ихийг хүлээж, миний шинэ аялалд хамтдаа оролцоорой. Баярлалаа!" хэмээн тэрээр нэмж хэлэв.
Тэр өдрийн тоглолтон дээр Да Ён "number one rockstar" хэмээх шинэ дуугаа анх удаа үзүүлж, үзэгчдийг гайхшруулсан. Хүчирхэг хоолой, толь, ширээ зэрэг эд зүйлсийг ашигласан өнгө алагласан бүжиг нь түүний олон жилийн хичээл зүтгэл, хүсэл тэмүүлэлээр бүтсэн тайзны хамгийн гялалзсан мөчийг илтгэсэн юм. Дараа нь "body" дуугаараа улам эрч хүчтэй, чөлөөтэй байдлыг харуулж, Да Ён-ы өвөрмөц түүхийг төгс төгөлдөр болгож, гүн сэтгэгдэл үлдээжээ.
Үүнээс гадна, Да Ён шагнал авах үеэр "WJSN" хамтлагийн гишүүд, "The Show"-ын хөтлөгч, харьяатын "Cravity" хамтлагийн гишүүн Хёнжүн, хамт тоглосон бүжигчидтэйгээ "body" дууны бүжгийг хамтдаа хийж, ялалтын баярыг хуваалцсан нь энэ ялалтын утгыг улам бүр нэмэгдүүлэв.
"body" нь 9-р сарын 9-нд худалдаанд гарсан Да Ён-ы анхны бие даасан "gonna love me, right?" дижитал синглийн гол дуу юм. Энэ дуу нь хэмнэлттэй ая, мартагдашгүй давталт, цэлмэг Да Ён-ы хоолойтой хослуулсан бүтээл юм. Да Ён нь уран бүтээлчийн хувьд өөрийн өвөрмөц хөгжмийн ертөнц, шинэ сорилт хийх чин сэтгэлийг харуулж, олон сонсогчдын зүрхийг эзэмдэж, амжилттай бие даасан уран бүтээлийн гараагаа эхлүүлсэн.
"body" дуу нь худалдаанд гарсаны дараа Melon TOP 100, Genie, Bugs, Flo, Vibe, YouTube Music зэрэг БНСУ-ын гол хөгжмийн чартуудад багтсан төдийгүй, Америкийн эдийн засгийн "Forbes", Их Британийн хөгжмийн "NME", Америкийн "FOX 13 Seattle" зэрэг томоохон гадаад хэвлэл мэдээллийн хэрэгслүүдийн анхаарлыг татаж, MTV зэрэг олон улсын сувгуудаар цацагдсан нь түүний дэлхий дахинд өөрийн байр сууриа өргөжүүлж байгааг харуулж байна.
Да Ён нь богино хэмжээний челлендж, сонсголын сесс, контентийн ард талын түүх зэрэг олон арга замаар фэнүүдтэйгээ харилцаж, бие даасан уран бүтээлийнхээ эрч хүчийг нэмэгдүүлж байгаа бөгөөд, анхны ялалт болон "number one rockstar" дууны тоглолт нь түүний ирээдүйн амжилтыг улам их хүлээлт үүсгэж байна.
Да Ён нь цаашид төрөл бүрийн хөгжмийн нэвтрүүлэг, контентуудаар дамжуулан бие даасан уран бүтээлээ үргэлжлүүлэх болно.
Ким Да Ён нь 2016 онд "WJSN" (Cosmic Girls) хамтлагийн гишүүнээр анхдагч болсон. Тэрээр тайзан дээрх эрч хүчтэй үзүүлбэр, гайхалтай хоолойгоороо алдартай. Мөн тэрээр төрөл бүрийн телевизийн шоу нэвтрүүлгүүдэд оролцож, уран бүтээлээ туурвидаг.