Жүжигчин Хван Жон-им компанийн мөнгийг завшсан хэргээр хорих ялтай боллоо

Өмнөд Солонгосын алдарт жүжигчин Хван Жон-им өөрийн харьяа байгууллагын мөнгийг завшсан хэргээр шүүхээс ял авлаа. Түүнд хоёр жилийн хорих ял оноож, дөрвөн жилийн тэнсэн харгалзах хугацаа тогтоосон байна.

Хяналтын байгууллагын мэдээлснээр, Хван Жон-им нь 2022 оны долдугаар сард өөрийн эзэмшлийн энтертайнмент компанийн нэр дээр 800 сая воны зээл авч, түүний 700 сая воныг нь өөрийн хувийн данс руу шилжүүлэн криптовалют хөрөнгө оруулалт хийсэн хэрэгт буруутгагдаж байсан юм.

Үүний дараа тэрээр 2022 оны аравдугаар сар хүртэлх хугацаанд нийт 4.36 тэрбум воны компанийн мөнгөнөөс 4.2 тэрбум гаруй воныг криптовалютад оруулсан нь тогтоогджээ. Мөн энэ явцад өөрт ногдсон хөрөнгийн болон орон нутгийн татварыг төлөхийн тулд картыны төлбөр 4.44 сая вон, үнэт цаасны барьцаат зээлийн хүү 1 сая воныг ч мөн завшсан мөнгөнөөс гаргасан байна.

Шүүх хуралдааны үеэр жүжигчин Хван Жон-им нь хэргийг бүрэн хүлээн зөвшөөрч, хохирлыг бүрэн барагдуулахаа мэдэгдсэн. Түүний өмгөөлөгчид компанийг хөгжүүлэх зорилгоор криптовалютад хөрөнгө оруулалт хийсэн бөгөөд нягтлан бодох бүртгэл, процедурын талаарх ойлголт дутмагаас ийм байдалд хүргэсэн гэж тайлбарлажээ.

Энэхүү хэрэг нь Солонгосын урлаг, энтертайнментийн салбарт томоохон шуугиан тарьж, олон нийтийн албан тушаалтнуудын санхүүгийн хариуцлага, ил тод байдлын чухлыг онцлон тэмдэглэв.

Хван Жон-им нь Sugar охидын хамтлагаар анх төрөн гарч, дараа нь жүжигчний карьераа эхлүүлсэн. Тэрээр "Kill Me, Heal Me" болон "She Was Pretty" зэрэг олон алдартай Солонгос драмануудад тоглосноор өргөнөөр танигдсан. Түүний хувийн амьдрал ч мөн хэвлэл мэдээллийн анхаарлыг татаж байсан бөгөөд гэр бүл, хүүхдийнхээ талаарх мэдээлэл байнга гардаг байв.