(G)I-DLE хамтлагийн Соён 'Hip Hop Princess' шоуны MC, продюсерээр ажиллана
БНСУ-ын алдартай "(G)I-DLE" хамтлагийн гишүүн Соён "Hip Hop Princess" нэртэй шинэ шоунд ганцаарчилсан MC болон ерөнхий продюсераар оролцохоо мэдэгдэв. Тэрээр 9 жилийн өмнө "Unpretty Rapstar" шоунд оролцож байсан туршлагатай билээ.
"Өмнө нь оролцогч байсан надад MC, продюсерээр буцаж ирэх нь маш том хүндэтгэл", хэмээн Соён сэтгэгдлээ хуваалцлаа. Түүний хувьд "Unpretty Rapstar" нь өөрийн зохиосон дуугаараа дебют хийж, продюсерээр ажиллах үндэс болсон гэж үздэг бөгөөд одоо бусад уран бүтээлчдэд өөрсдийн авьяас чадварыг нээн харуулахад нь дэмжлэг үзүүлэхээр болжээ.
"Hip Hop Princess" шоунд Соён MC-ийн хувиар хөтөлбөрийн ерөнхий явцыг чиглүүлэх бөгөөд нөгөө талаас оролцогчдын авьяасыг нээн гаргахад гол үүргээ гүйцэтгэх юм. Тэрээр "Үнэлгээний гол шалгуур бол чадвар байх болно" хэмээн онцолж, "Unpretty Rapstar"-т оролцож байхдаа ч зөвхөн чадвараараа үнэлэгдэхийг хүсдэг байсан тул энэ удаа ч чадварыг хамгийн чухалд үзнэ" гэв.
Соён нь Кеко, Риехата, Таканори Ивата зэрэг шилдэг уран бүтээлчидтэй хамтран ажиллах талаар "Риехата бид хоёр тайзны найруулга, үзүүлбэр зэрэг ерөнхий талыг хариуцна. Харин Кеко, Таканори нар реп болон бусад ур чадварын нарийвчлалыг харах байх" хэмээн тайлбарлав. "Солонгос, Япон хоёр орны продюсерүүдийн үүрэг хуваарилалт сайн зохицсон тул тэнцвэртэй үнэлгээ, онцгой хамтын ажиллагааг хүлээж болно" гэж тэр нэмж хэлсэн юм.
"Hip Hop Princess" нь Mnet телевизээс шинээр эхлүүлж буй Солонгос-Японы хамтарсан хип-хоп бүжиглэх хамтлаг байгуулах төсөл юм. Оролцогчид хөгжим, бүжиг, загвар, видео хийх гээд бүх шатанд өөрсдийн өнгө төрхийг харуулна. Хип-хопыг хэрэглүүлэх замаар Солонгос, Японы өөр өөр соёл нэгдэж, шинэ соёлыг бүтээж, өвөрмөц уран бүтээлч болж төлөвшихөд нь туслах юм.
Хоёр орны оролцогчид нэг дор цугласан бичлэгийн үеэрх уур амьсгалын тухай Соён "Залуучуудад юм бүтээх нь амар биш байдаг ч бүгдээрээ хийж чадаж байгаа нь гайхалтай байна. Зохион бүтээгдэж буй бус, өөрсдөө бүтээж буй оролцогчид гарч ирсэн нь хамгийн сонирхолтой зүйл. Оролцогчдын өөрсдийн өвөрмөц байдлыг олж, бүтээж буй явцыг хамтдаа үзнэ үү" хэмээн онцолжээ.
"Hip Hop Princess" шоуны нээлт аравдугаар сарын 16-нд Mnet телевизээр 21:50 цагт болох бөгөөд Японд U-NEXT сувгаар зэрэг цацагдах юм.
Соён нь 2018 онд (G)I-DLE хамтлагийн гишүүнээр дебют хийсэн бөгөөд эрч хүчтэй реп болон продюсерийн авьяас чадвараараа хурдан танигдсан. Тэрээр 2015 онд 'Unpretty Rapstar' шоуны хоёрдугаар улиралд оролцож, хамгийн залуу оролцогчдын нэг байсан ч өөрийн гэсэн өндөр байр суурийг эзэлсэн. Хуучин оролцогчийн хувьд тэрээр шинэ шоуны оролцогчдын тулгарч буй бэрхшээлийг гүн гүнзгий ойлгодог.