US संगीतावर शोककळा: TikTok स्टार रॅपर D4vd च्या गाडीत सापडला बेपत्ता मुलीचा मृतदेह
अमेरिकेतील संगीत विश्वात एक धक्कादायक घटना घडली आहे, ज्याचे पडसाद अजूनही उमटत आहेत. डेली मेलने दिलेल्या वृत्तानुसार, टिकटॉक स्टार आणि लोकप्रिय रॅपर D4vd (मूळ नाव डेव्हिड अँथनी बर्क, वय २०) याच्या गाडीतून बेपत्ता झालेल्या १३ वर्षीय मुलीचा मृतदेह सापडला आहे. या घटनेमुळे अमेरिकन संगीत क्षेत्र हादरले आहे. D4vd ची तुलना बिली आयलिश आणि SZA सारख्या कलाकारांशी केली जात होती.
मृत मुलगी सेल्स्टे रिवाझ हर्नांडेझ, जी मे २०२४ मध्ये १३ वर्षांची असताना घरातून बेपत्ता झाली होती. स्थानिक पोलिसांनी दिलेल्या माहितीनुसार, तिचा अत्यंत विद्रूप आणि कुजलेल्या अवस्थेतील मृतदेह सप्टेंबर महिन्याच्या सुरुवातीला D4vd च्या टेस्ला गाडीतून सापडला. मृतदेह प्लास्टिकमध्ये गुंडाळलेला होता आणि गाडी हॉलीवूड हिल्सच्या एका आलिशान निवासी भागाजवळ सोडून देण्यात आली होती.
कुटुंबीय आणि शेजाऱ्यांच्या म्हणण्यानुसार, सेल्स्टे आणि D4vd एकमेकांना डेट करत होते. सेल्स्टेचा भाऊ म्हणाला की, 'माझी बहीण D4vd सोबत चित्रपट पाहायला गेली होती आणि परत आलीच नाही.' तिची आई म्हणाली, 'माझी मुलगी 'डेव्हिड' नावाच्या मुलासोबत रिलेशनशिपमध्ये होती.' शेजाऱ्यांनीही दोघांना अनेकदा एकत्र पाहिले होते.
ही घटना घडली तेव्हा D4vd अमेरिकेतील वर्ल्ड टूरवर होता. या घटनेनंतर त्याला युरोप आणि ऑस्ट्रेलियामधील उर्वरित टूर रद्द कराव्या लागल्या. तसेच, क्रॉक्स आणि हॉलिस्टर सारख्या जागतिक ब्रँड्सच्या जाहिरात मोहिमांमधूनही त्याला वगळण्यात आले आहे, ज्यामुळे त्याच्या प्रतिमेला धक्का बसला आहे.
पोलिसांनी D4vd ने भाड्याने घेतलेल्या सुमारे ४ मिलियन डॉलर्स (सुमारे ५५ कोटी रुपये) किमतीच्या बंगल्याची झडती घेतली असून, इलेक्ट्रॉनिक उपकरणे आणि इतर वस्तू जप्त केल्या आहेत. मात्र, अद्याप पोलिसांनी कोणत्याही संशयिताची किंवा आरोपीची ओळख जाहीर केलेली नाही. माजी सरकारी वकील नेमा रहमानी यांनी सांगितले की, 'गाडीत मृतदेह सापडणे ही एक गंभीर बाब आहे, विशेषतः तो विद्रूप अवस्थेत आढळल्यास परिस्थिती अधिक गंभीर होते. अटक होणे हे केवळ वेळेचे काम आहे.'
ऑनलाइन जगात या घटनेची चर्चा सुरू झाली आहे. D4vd च्या 'Romantic Homicide' या गाण्याचे बोल पुन्हा चर्चेत आले आहेत. सोशल मीडियावर त्याच्या स्टेज परफॉर्मन्स आणि 'Celeste Demo unfin' या न रिलीज झालेल्या गाण्यावरूनही वाद सुरू झाला आहे. काही नेटिझन्सनी 'गाण्याचे बोल आणि वास्तविक घटना यात भयानक साम्य आहे' अशी शक्यता वर्तवली आहे.
या घटनेचा तपास अजूनही सुरू आहे आणि अनेक प्रश्न अनुत्तरित आहेत. सेल्स्टेचे १६ महिने बेपत्ता असण्याचे तपशील, मृत्यूचे नेमके कारण आणि गाडीतील कॅमेऱ्यांचे रेकॉर्डिंग हे पुढील तपासासाठी महत्त्वाचे ठरू शकते.
D4vd (डी-फोर-व्ही-डी) हे एक अमेरिकन रॅपर आहेत, ज्यांचे खरे नाव डेव्हिड अँथनी बर्क आहे. टिकटॉक प्लॅटफॉर्ममुळे ते जगभरात प्रसिद्ध झाले. त्यांच्या 'Romantic Homicide' या गाण्याला खूप लोकप्रियता मिळाली. त्यांच्या संगीतात अनेकदा भावना आणि नातेसंबंधांचे चित्रण असते, ज्यामुळे ते तरुणांमध्ये लोकप्रिय आहेत.