நியூஜீன்ஸ் உறுப்பினர்களின் முகங்களை பயன்படுத்தி ஆபாச படங்களை பரப்பிய இளைஞருக்கு அபராதம்

தென் கொரியாவில், பிரபல கே-பாப் குழுவான நியூஜீன்ஸின் உறுப்பினர்களின் முகங்களை பயன்படுத்தி ஆபாச படங்களை உருவாக்கி பரப்பிய 20 வயது இளைஞருக்கு, 15 மில்லியன் வோன் (சுமார் ₹9.3 லட்சம்) அபராதம் விதிக்கப்பட்டுள்ளது.

டேகு மாவட்ட நீதிமன்றத்தின் போஹாங் கிளையின் சிறப்பு குற்றவியல் பிரிவு, A என்றழைக்கப்படும் இந்த இளைஞருக்கு, குழந்தைகள் மற்றும் இளைஞர்கள் மீதான பாலியல் சுரண்டல் பாதுகாப்புச் சட்டத்தின் கீழ் தண்டனை வழங்கியுள்ளது. அபராதத்துடன், 40 மணி நேர பாலியல் குற்ற சிகிச்சை திட்டத்தையும் அவர் முடிக்க வேண்டும்.

கடந்த ஜனவரி மாதம், கியோங்புக் மாகாணத்தில் உள்ள போஹாங்கில் உள்ள தனது வீட்டில், நியூஜீன்ஸ் உறுப்பினர்களான ஹெரின், ஹன்னி மற்றும் மின்ஜியின் முகங்களை செயற்கையாக இணைத்து போலியான வீடியோக்களை உருவாக்கி, அவற்றை டெலிகிராம் வாயிலாக பரப்பியதாக அவர் மீது குற்றம் சாட்டப்பட்டுள்ளது.

நீதிமன்றம், இந்த குற்றச்செயல் 200க்கும் மேற்பட்டோர் இணைந்திருந்த டெலிகிராம் சேனலில் பரப்பப்பட்டதையும், பாதிக்கப்பட்டவர்களிடம் இருந்து மன்னிப்பு பெறாததையும் தண்டனைக்குரிய காரணங்களாக குறிப்பிட்டது.

நியூஜீன்ஸின் நிர்வாக நிறுவனமான ADOR, ஏற்கனவே இதுபோன்ற செயல்களை சட்டரீதியாக எதிர்கொள்வதாக அறிவித்துள்ளது. குறிப்பாக, டீப்ஃபேக் குற்றங்களுக்கு எதிராக கடுமையான நடவடிக்கை எடுக்கப்படும் என்றும், இது தொடர்பாக சட்ட அமலாக்க அதிகாரிகளுடன் இணைந்து செயல்படுவதாகவும் தெரிவித்துள்ளது.

இந்த செய்தி வெளியானதை அடுத்து, கொரிய இணையவாசிகள் கடும் அதிர்ச்சியையும், கோபத்தையும் வெளிப்படுத்தியுள்ளனர். "இது போன்ற குற்றங்களுக்கு கடுமையான தண்டனை வழங்கப்பட வேண்டும்" என்று பலரும் கருத்து தெரிவித்துள்ளனர். "சமூக வலைத்தளங்களில் இது போன்ற தவறான செயல்களை தடுக்க வேண்டும்" என்றும் கோரிக்கை விடுத்துள்ளனர்.