நடிகை எம்மா வாட்சன் நீண்ட இடைவெளி பற்றி வெளிப்படையாகப் பேசுகிறார்!

பிரபல ஹாலிவுட் நடிகை எம்மா வாட்சன், தனது நீண்ட கால நடிப்பு இடைவெளி குறித்து மனம் திறந்துள்ளார்.

சமீபத்திய ஒரு பேட்டியில், நடிகை வாட்சன் தனது வாழ்க்கையின் இந்த கட்டம் மிகவும் மகிழ்ச்சியாகவும் ஆரோக்கியமாகவும் இருப்பதாகக் குறிப்பிட்டுள்ளார். 2018ல் வெளியான 'Little Women' படத்திற்குப் பிறகு அவர் பெரிய திரையில் தோன்றவில்லை, சுமார் 7 வருடங்களாக அவர் நடிப்புலகில் இருந்து விலகி இருக்கிறார்.

"பொதுவெளியில் நிற்பதன் சுமை மிக அதிகம். படங்களை உருவாக்குவதை விட, அவற்றை விளம்பரப்படுத்தி விற்பனை செய்வது மிகவும் கடினமானது" என்று அவர் தனது நடிப்பு வாழ்க்கையில் இருந்து விலகி இருக்கக் காரணம் கூறியுள்ளார்.

"உண்மையைச் சொல்வதானால், ஒரு பொருளை 'விற்கும்' அனுபவத்தை நான் மிஸ் செய்யவில்லை. அது என் ஆன்மாவை அரிக்கும் அனுபவமாக இருந்தது. ஆனால், நடிப்பின் மூலம் எனது திறமையை வெளிப்படுத்தும் பணியையும், படைப்புகளை உருவாக்கும் செயல்முறையையும் நான் இன்னும் மிஸ் செய்கிறேன்" என்றும் அவர் பகிர்ந்துள்ளார்.

வாட்சன் நடிப்பை 'ஆழ்ந்த தியானம்' என்றும் ஒப்பிட்டுள்ளார். "படப்பிடிப்பில் ஈடுபடும்போது, ​​நான் மற்ற உலகத்தை மறந்து, அந்த தருணத்தில் மட்டுமே கவனம் செலுத்த முடியும். அது ஒரு பெரிய விடுதலையும் சுதந்திரமும் ஆகும். அதை நான் இன்னும் மிஸ் செய்கிறேன். ஆனால், அதனுடன் வரும் அழுத்தத்தை நான் மிஸ் செய்யவில்லை" என்று அவர் சிரித்தபடி கூறினார்.

"நான் ரொம்ப காலமாக வேலையில் மட்டுமே மூழ்கி இருந்தேன். அதனால் என் வாழ்க்கையே கேள்விக்குறியானது. இப்போது நண்பர்கள், குடும்பம், வீடு போன்ற வாழ்க்கையின் அடித்தளத்தை வலுப்படுத்த எனக்கு நேரம் தேவைப்படுகிறது. அது இல்லாமல், திட்டங்களுக்கு இடையே உள்ள இடைவெளி பயத்தை ஏற்படுத்தும், அது என்னை தொடர்ந்து ஓட வைக்கும், அது ஆரோக்கியமானதல்ல" என்று அவர் வலியுறுத்தினார்.

இதற்கு முன்னர், 2023 இல் வெளியான 'Financial Times' உடனான பேட்டியிலும், "நான் நடிக்கும்போது மகிழ்ச்சியாக இல்லை. சிறையில் இருப்பது போல் உணர்ந்தேன்" என்று அவர் வெளிப்படையாக கூறியிருந்தார். 'Little Women' படத்திற்குப் பிறகு, அவர் 'Harry Potter 20th Anniversary: Return to Hogwarts' போன்ற சில சிறப்பு நிகழ்ச்சிகளில் மட்டுமே தோன்றியுள்ளார்.

'Harry Potter' தொடரில் ஹெர்மாயினி என்ற கதாபாத்திரத்தின் மூலம் உலகளவில் பிரபலமானவர் எம்மா வாட்சன். அதன் பிறகு 'Noah', 'The Bling Ring', 'The Perks of Being a Wallflower', 'Beauty and the Beast', 'Little Women' போன்ற படங்களிலும் அவர் தனது நடிப்பிற்காக பாராட்டுகளைப் பெற்றார். குறிப்பாக 'Beauty and the Beast' திரைப்படம் உலகளவில் 1 பில்லியன் டாலருக்கும் அதிகமான வசூலைப் பெற்று சாதனை படைத்தது.

எம்மா வாட்சன், குழந்தைப் பருவத்தில் இருந்தே நடிப்புத் துறையில் தனது பயணத்தைத் தொடங்கினார். அவர் ஒரு நடிகை மட்டுமல்லாமல், ஐக்கிய நாடுகளின் நல்லெண்ண தூதராகவும் பணியாற்றியுள்ளார். சுற்றுச்சூழல் பாதுகாப்பு மற்றும் பெண்களுக்கு சம உரிமை போன்ற விஷயங்களில் அவர் தீவிரமாக ஈடுபட்டு வருகிறார்.